【娛圈反國教】
填詞人黃偉文（Wyman）創作反國教歌，收到短訊恐嚇，找誰唱都仍未知，好友容祖兒前晚出席活動，表示不介意唱。Wyman對祖兒支持願唱，大讚她勇敢，更希望有心的歌手、藝人會自動蒲頭。
熱血群星齊心反國民教育，曾表態要跟林夕合作寫歌《Can we talk》撐學民思潮的黃偉文，前日收恐嚇短訊，更有部份歌手拒唱該歌。容祖兒前晚在銅鑼灣出席珠寶活動，表示不擔心好友Wyman，她說：「佢不嬲有個勇字喺額頭。」
「都係為咗小朋友」
問祖兒可夠膽唱撐學民歌《Can we talk》？她即說：「點解唔敢唱？」近期有傳聞指中聯辦向娛樂公司施壓，叫旗下藝人歌手收聲，祖兒說：「唔多識答喎。」不過祖兒繼續表態：「由第一日開始，都係為咗小朋友，想畀小朋友最好嘅教育，家事件越搞越大，唔係想見到嘅事，知道傳媒係支持、擔心全個香港嘅事，而用冷靜嘅心情去面對，先係成熟人嘅處事方法。」
Wyman昨日得悉祖兒表示願唱撐學民歌，他說：「兩睇，人到咗一個位，知道乜事應該做，乜唔應該做，好高興見到佢選擇應該做嘅事，但得一個祖兒唔夠，希望越嚟越多祖兒，明白人唔係獨立生存，有公司、家人、朋友，做啱事未必係身邊人鼓勵、贊成，一方面覺得祖兒份外勇敢，但一個唔夠，最緊要身邊人支持。」至於可有其他歌手提出想唱？Wyman說：「暫時冇，我唔係召集人，寫出嚟各方支持會蒲頭。」
徐淑敏前晚也對國民教育大呼驚驚，她說：「驚呀，怕影響到細路，有必要嘅話都會轉校。」何超雲和超蓮也一條心反洗腦，齊在微博上載黑衫相。超雲撐Wyman寫道：「有些時刻，就是要把黑與白認真的搬出。」
阿徐怕冇得返內地
徐濠縈前晚在銅鑼灣出席時裝店活動，對於好友Wyman收恐嚇短訊，阿徐說：「我會打去問候佢，但做藝人好難，有時要去內地工作，唔方便發表太激烈，好多嘢在心中啦！」阿徐表示未聽聞中聯辦向娛樂公司施壓，問她是否怕影響陳奕迅在內地的工作？她說：「我顧咗自己先，有親戚喺上海，唔想冇得返大陸。」
採訪：林嘉慈、余燕儀
攝影：黃文偉