年輕的羅慧娟走了，傷盡了家人、朋友的心，摯友陳法蓉在娟妹離開時沒陪伴左右，但她不覺遺憾，因娟妹給她的愛、正能量夠她受用，自比如月亮般陰暗的法蓉，感激天意讓她碰上如太陽的娟妹，如今彼此分隔，但早已約定他生某地再擁抱。
撰文：羅美倫
終年45歲的羅慧娟於今年6月30日戴着光環辭世，傷透家人、朋友的心。陳法蓉於89年拍《人在邊緣》認識羅慧娟及黎美嫻，為生活帶來色彩，回想往事，故友再為法蓉帶來笑聲：「娟妹好開朗，同我唔同，當時同黎美嫻三個做女主角，我冇演戲訓練，佢兩個已經係金庸電視劇女主角，又鍾意講嘢畀人聽，我比較口密，有次三個半夜遊車河，猛叫我講秘密，否則唔畀落車，我剛入行幾保護自己，但畀佢哋逼講出心事後好開心，知道以後有事可以搵佢哋。」
匿埋廚房喊
相交超過20年，法蓉永遠看到娟妹的堅強與樂觀，但真正了解還是在她發病後，「羅慧堅」把法蓉嚇傻了：「娟妹走之前同我講好擔心我，因我白白癡癡，朋友問我點正面陪娟妹行最後一段路，我好慚愧，唔係佢跌低我拉起佢，反而係娟妹好正面帶我行。記得佢第一次除低假髮畀我睇佢光頭，我冇講嘢，佢就話『咁好，透氣呀，做乜要遮住佢呢？』然後上房攞嘢，我就匿埋廚房喊。」法蓉形容娟妹性格猶如太陽，她自己則像月亮，比較哀傷。是否已約定天堂再見？法蓉說：「知佢唔再痛苦，喺天堂度等我，相信有日會再遇上。」
法蓉十分懷念昔日同床吃薯片、開心大笑、不開心同哭的日子：「好感恩喺娟妹病情反覆時，我可以陪佢好多，有次我星期日走，喺床邊同佢勾手指，話下次返嚟再見，其實每次走都唔知下次再見唔見到，嗰幾日走咗，佢突然唔好，我就會飛返去，好笑，佢開眼見到我，眼神係：你唔係嘛，你又返嚟？跟住有朋友話唱歌畀佢聽，佢眼神係：唔使喇係嘛！佢嗰陣仍然好幽默。」
釋懷講再見
問到法蓉在娟妹離世時不在身旁可覺遺憾？法蓉說：「每次同佢講拜拜都知下次未必喺度，有諗過不如返去，但佢家人叫我哋做自己嘢，嗰幾晚擔心到瞓得唔好。新加坡嘅喪禮做得好，搞幾日，每日有牧師、親友分享，唔似香港鞠個躬講句拜拜就走，喺新加坡我可以一次又一次走埋去同佢唱詩歌、傾偈、祈禱，講早晨，我嚟咗，我走喇，拜拜，有三日時間好釋懷咁講再見，我終於明白喪禮唔係做畀死人，係做畀活人，畀佢哋復元憂傷，堅強同死者道別。我知娟妹要去邊，唔再辛苦，講咗再見，知第時邊度再見，真係冇遺憾。」法蓉已把娟妹答謝她的愛的短訊，好好收藏起來。
缺點易信人
娟妹對法蓉的影響很大，娟妹相交滿天下，又愛搞派對，令較深閨自閉的法蓉改變，她在娟妹生病時，每次都盡量參加，娟妹的朋友都變成她朋友，令她不再孤僻。日前法蓉就與廿多個朋友到娟妹屋企，探娟妹夫婿劉志敏。娟妹不但對法蓉有正面影響，她留低的見證也化成祝福留給世人，這個大好人有缺點嗎？法蓉笑說：「梗係有，佢太坦白、太易信人，唔會防人，遇新知舊友都會講自己一生畀人聽，遇到壞人就會呃佢，佢有善良嘅心，唔知呢個世界有唔好心地嘅人。」
一年拍百劇捱到病
06年陳法蓉一年內在內地拍了近100集劇集，翌年開工時經常作嘔，但回到香港休息就沒事，初時她以為在內地水土不服或休息不足之故，直至返港求醫，才證實患上嚴重的胃液倒流，吃藥治療足足停工休息九個月，法蓉說：「休息完覺得冇乜事就返內地拍《暴雨梨花》，又再辛苦，醫生話唔醫會變喉癌。」剛巧那時轉新經理人，法蓉就要求由拍劇轉型拍廣告及做活動，她感謝在無綫拍劇時基礎打得好，令她在內地的廣告活動維持不錯水平，收入並沒減少。
城電斟加盟
法蓉自此開始注重健康，認真戒口，不讓自己太辛苦避免舊病復發，近年病情穩定的她又靜極思動：「我好鍾意拍戲，一直有人搵，城市電訊都有搵過我，但唔想太辛苦，除非劇本好、對手啱先值得考慮，最近傾緊部微電影，或者試吓健康應唔應付到。」