關楚耀前晚在銅鑼灣出席新片首映，遭數名滋事青年騷擾，有人用手指扮假陽具，令關楚耀大感尷尬。同場的鍾蕙芝（Lavina）和陳爽拋胸鬥性感，Lavina揚言要防止男人出軌，整容整到李嘉欣咁靚都冇用，最重要保持好身段。
關楚耀、鍾蕙芝、陳爽和田啟文（田雞）等前晚在銅鑼灣JP戲院出席新片《轟天猛將2》首映，當嘉賓逐一上台影相時，關楚耀竟然遇上一班搞事青年，他們在台下不停叫囂及講粗口，其中一人更將手指插入褲內扮假陽具，關楚耀全程「時運高」扮看不見，但離開時表情尷尬，只能擠出牽強笑容。
Lavina：出軌似生癌
陳爽和Lavina有幸避過滋事青年，兩人均以性感打扮亮相，Lavina透露最近有朋友的男友出軌，她自爆曾有同樣遭遇：「有次check男友手機，發現佢出軌半年，同朋友討論過呢個話題，覺得男人出軌好似生癌症一樣，早啲check就早啲發現。」她自言要預防最好要加強自己魅力，問到是否整容？她笑說：「好似李嘉欣咁美若天仙都會厭啦，我會喼弗多啲。家我間中會返內地工作，唔介意同內地男仔發展，但未搵到啱眼緣。」
田雞撐星爺唔孤寒
另外，周星馳最近被舊愛于文鳳追討賣樓佣金，身為星爺好友的田雞自言有好多人致電給他，為避談不會刻意問星爺，問到可覺得星爺為人孤寒？他說：「好難講，至少佢冇爭我哋斗零，該畀都畀晒，出糧好準時，可能裏面有好多嘢我哋唔知。」有指星爺當時一腳踏兩船，同時與于文鳳及莫文蔚拍拖，田雞續撐說：「我識佢好耐啫，但點知幾時先係佢正式女友呀，呢啲多餘嘅。」
採訪﹕溫敏芝
攝影﹕陳志嵐