名作家真迹字字千金。周作人79歲時送咗首詩畀友人元東先生，近半世紀後，呢幅逾70字嘅書法將公開拍賣，底價25萬元。新亞圖書中心負責人蘇賡哲話，周作人真迹書法好少見，預計競投激烈。
今次拍賣另一焦點係著名作家錢鍾書一篇手書詩作《秋心》，八方睇過預展，字字蒼勁中見優雅；另有10封由文學家林語堂親筆嘅英文信，兩者同樣底價8萬元。八方係「紅迷」，有興趣係清朝版本、民國印製嘅《國初鈔本原本紅樓夢》，12冊線裝底價5,000元。
線裝紅樓夢底價五千元
最近國民教育科俾人狂鬧洗腦，1965年台灣出版《我們的中華》手冊，介紹中國河山，雖然都有讚吓蔣介石，但冇叫人見到青天白日旗要流淚，八方建議吳克儉參詳吓，底價100元。舊書字畫拍賣今日下午1時至8時，喺旺角中僑商業大廈22樓舉行。