賭王千金何超儀早排想搵林克霖（龍心）拍戲，點知俾龍心老點佢犯法燒銀紙，龍心又自拍短片爆粗辱駡超儀，激到超儀生蝦咁跳，兩個人仲喺Instagram展開駡戰。不過，俾龍心搞到好唔開心嘅超儀，好在有老公陳子聰錫番，前晚兩公婆孖住去中環超市買餸，估計佢哋準備返屋企玩煮飯仔。
人有三急
前日傍晚6點半，超儀同子聰着住撐反國教嘅黑色衫行置地廣場間ThreeSixty超市，舊年成功減咗70磅肥肉嘅陳子聰，身形睇嚟脹番小小，佢推住車仔同超儀買菜、生果同麪包，揀嘅食物都好健康，反而超儀對薯片等零食好有興趣。
行到咁上下，超儀突然人有三急，於是問超市男職員借洗手間用，陳子聰就一個人繼續逛。大概5分鐘後，超儀成個舒服晒咁走番出嚟，跟住陳子聰畀完錢之後，兩公婆就孖住離開。
採訪、攝影：朱志聰
