隔牆有耳:<br> 如何掉眼淚 欲哭找根據 - 李八方

隔牆有耳:
如何掉眼淚 欲哭找根據 - 李八方

對絕食人士冷漠得可怕嘅政務司司長林鄭月娥,噚日接受有線新聞專訪突然喊起嚟,話已經將個人誠信同公信力,押注今屆政府。吓!堂堂特區政府一人之下、萬人之上嘅女高官,買大開細輸咗就要喊,眼淺咗啲喎。難怪佢下午匆匆解畫,話喊唔係因為押錯注,係感觸市民唔信政府。
一滴眼淚,就見到香港高官嘅政治智慧水平,喊咗冇得返轉頭,貶晒值。對一個政客而言,眼淚係好重要政治武器,好似銀紙咁,亂印會貶值。現任世衞總幹事嘅陳馮富珍,97年任衞生署署長面對禽流感,每次講起染病嘅前線人員就喊;沙士爆發後,立法會舉行聆訊問責,又喊到收唔到聲,呢啲眼淚咪貶值囉。

Cheap曾谷不出淚

前特首曾蔭權被揭收受利益,逼上立法會解釋個人誠信同操守,講到好委屈咁忍唔住咬緊雙唇哽咽30秒,呢一幕都幾經典;男兒有淚不輕彈,點知煲呔曾嘅淚被外間形容「谷唔出淚」、「啲戲好假」,呢啲眼淚唔值錢。
乜嘢眼淚先值錢?遠啲有先後任行政同立法兩局首席非官守議員嘅鄧蓮如,喺香港主權交還中國前嘅過渡期,都係哽咽流過一次淚,就係向英國政府哀求發畀300萬香港出生嘅華人英國國籍,呢滴眼淚,係歷史性嘅眼淚。近嘅有台灣民進黨總統候選人蔡英文,1月14日晚喺競選總部台上含淚作出敗選宣言,震撼人心,更為四年後捲土重來鋪路:「你可以哭泣,但不要洩氣。你可以悲傷,但是不要放棄。」
講開又講,身為人父嘅壹傳媒老闆肥佬黎,噚日喺DBC數碼電台一開咪講到洗腦教育都喊咁口,「搞到我哋啲細路仔,一定唔可以,一定唔可以讓步,要用選票保護孩子」。肥佬黎仲話,選民投泛民就得,力撐公民黨余若薇、社民連陶君行。

mailto:pf_lee@appledaily.com