中國國家足球隊（國足）一向醜聞多多，打假波之餘，打交當食生菜，被冠以球霸之名；不過「一山還有一山高」，周四友賽作客瑞典，就遇上世界頂級球霸：伊巴謙莫域，結果國足俾伊巴又飛腳又摔撻，搞到足球場變成功夫擂台，完全K.O.！
瑞典周四喺希爾星堡主場對中國，賽前就傳出國足竟然收到成600萬人仔（約734萬港元）戲金，我求大俠都覺得奇，原來受人錢財，真係要替人消災。今季轉投巴黎聖日耳門嘅伊巴謙莫域，之前已傳出同新隊友利尼打交；今次面對國足，又再似打交多過踢波。
國足全場兩射門負0:1
伊巴只上陣45分鐘，不過都足夠展示驚人武功；先用一記天殘腳，踢到上國足中堅趙鵬個頭度，好彩趙鵬夠硬淨冇受傷。之後伊巴唔憤氣個波俾對方中場張遠偷咗，轉用一招箍頸式摔撻，張遠又應聲倒地。不過，以國足球員嚟講，最傷都係鄭智，喺23分鐘俾主隊中場華布隆批肘打中，即時流鼻血，搞到要退下火線。
伊巴謙莫域只踢上半場就收工，但唔代表下半場國足就好好過，事關瑞典成場都圍住嚟攻，前鋒艾文達47分鐘仲單刀建功，幫主隊先開紀錄；如果唔係國足門將王大雷連番神救，瑞典又點止入一粒。由西班牙籍教練甘馬曹接手後，國足進攻都係唔多掂，苦戰至89分鐘先有第1次射門，全場都係得2次咁大把，梗係冇波入啦，結果瑞典小小地贏1:0。
國足下一場都係唔易捱，周一就要到巴西城市累西腓，同巴西友賽；森巴兵團陣容有幾勁？前鋒有剛以5,000萬歐元（約4.9億港元）加盟辛尼特嘅侯克，仲有新星尼馬、奧斯卡杜斯山度士等等，實力點止超國足3班。雖然國民教育教大家，遇上國家隊嘅比賽，要大力支持同打氣，不過我求大俠就唔怕被河蟹：中國輸少過3球都當贏啦！
