「我其實好享受小鳥依人！」說這話正是家做緊舞台劇《打轉教室》嘅「蜘蛛女」鄭麗莎（Lisa）。呢句唔係台詞，喺正沐浴愛河嘅Lisa嘅心底話，男友Calvin文武全才，牛津大學畢業，又係跆拳道黑帶，難怪拍拖10個月，Lisa話對自己嘅運動及演藝事業都好大幫助，真係恭喜恭喜！
話劇表演到愛丁堡
每次提起男友都咪咪嘴笑到好甜嘅Lisa話：「男友同佢嘅家人好鼓勵我同支持我做嘅一切，對我嘅成就感到光榮，佢亦畀到我無限動力。」兩人去年11月喺健身室認識，Lisa話任職投資專家Calvin用免費教英文這一招力追自己，佢則欣賞對方有上進心、有腦筋。
26歲嘅Lisa今年中攞完全港健美賽同搶包山冠軍後，一直埋頭參演《打轉教室》，上月呢個無語言形體舞台劇剛剛喺愛丁堡藝穗節演出21場，去足愛丁堡一個月嘅Lisa日日以msn或電話同男友聯絡，拍過4次拖嘅Lisa話：「認識Calvin前我太理性，只識得做運動，現在情感豐富很多，對我喺舞台劇表演很有幫助。」套劇現再度喺香港藝術中心壽臣劇院公演，每日上演兩場，演至周日（09/09），票價為$250及$180。
一齊喺健身室練習
「在運動方面呢，好似佢今年都有到場睇我參加健美比賽同搶包山，有佢喺身邊支持，我感覺士氣大增不少，所以今年搶包山，我連男仔都贏埋。」，佢又話：「我同男友係喺健身室認識，大家都係嗰種鍾意健身同保持體態良好嘅人，所以我哋日日都會一齊到健身室練習，當拍拖可當keep fit。」
愛情，真係好大威力，平時硬橋硬馬嘅Lisa，話家閒時會學吓煮嘢食，以前一直想進軍演藝界的宏願，也因Calvin而轉為「順其自然」，但就希望30歲前結婚，然後生夠6個小朋友。