香港政府要借國民教育洗腦，其實洗腦早在電影工業開展。合拍片的糖衣背後是要你犧牲部份普世價值，可喜的是市民大可用門票說不，犯不着以絕食來乞求。說遠了，很早已經從事合拍電影，同樣被稱為長毛的陳可辛，他的《投名狀》很早已達億元票房，既得利益者表示沒放棄過港產片。同時他希望藉擔任今屆威尼斯影展的評審，告誡部份內地傳媒，不要凡事將事件放大，就如今年影展沒有華語片競賽，就自我幻想出種種陰謀，並狠批內地民族主義抬頭，緣起於民族自卑這可悲的事實，大膽言論背後是一課很好的國民課題。
撰文：文國駿
香港導演陳可辛（Peter）今年獲邀成為今屆威尼斯影展評審之一，亦是唯一的華人代表，日前他在當地接受本報專訪，大會規定他不能討論有關今屆電影的問題及評分準則，不過今年不少媒體都找他問同一問題，Peter說：「之前好多內地記者都打畀我，問我有關今屆冇華語片參與競賽單元嘅問題，我同佢講我唔答得唔得，因為我係一個好唔民族主義嘅人。」
民族自卑唔健康
對於競賽電影中沒有華語片一事，被華語媒體無限放大重提，Peter自言看不過眼，狠批是內地部份人的民族主義作祟加上自我膨脹，變成所有事都理所當然，他說：「中國民族主義近年太犀利，影響埋港、台。大家都將文化外輸睇成太大嘅一件事，可能中國呢幾百年國運唔好，近年稍為好啲就將呢樣嘢（民族主義）無限放大。每一個人都體驗緊成就，唔使乜嘢都祖國前、祖國後，家又唔係搞奧運，當然我咁講喺內地嚟講非常之唔主旋律，不過電影真係唔應該咁樣分法。其實民族主義係來自民族自卑，冇自卑又點會有呢樣嘢？其實係幾可悲嘅一件事，好唔健康。」
Peter表示電影節有甚麼電影入圍，從來都是彩數掛帥，不應該將事件陰謀化，他笑說：「有乜嘢戲參展好睇天時地利，今年好多參展電影會喺9月、10月上映，所以用影展做宣傳平台。同埋我同上屆威尼斯主席中國通Marco Muller好好朋友，而且Marco好鍾意華語電影，咁多年佢都冇邀請過我做評審，反而新主席Alberto Barbera同我唔相識反而叫我做，咁又點解釋，唔通又有陰謀呀。」
北上發展廢武功
Peter說得狠亦是親身體會，08年他曾憑中港合拍電影《投名狀》進佔內地億元票房，接下來跟導演陳德森合作，監製了《十月圍城》的票房更超越《投》片。不過當中經歷的苦，只有當事人才能了解，Peter表示那些年真的可以用有苦自己知來形容，他說：「唔係講風凉話，嗰幾年真係為勢所迫『被拍大片』，大製作呢三個字對我嚟講都幾諷刺，我唔係大製作出身，只係近年『被大製作』慣咗，我其實都好困擾，拍咗呢幾年之後個人已經攰到不得了，當然北上合拍片已經係市場大勢所趨，要躲要避都唔得。」
初到內地拍攝Peter表示感覺自己像被廢了武功一樣：「我嘅強項係情懷同集體回憶，但香港導演返到去好難拍到地道嘢，因為成長經驗唔同。所以就『被大製作』咗幾年，事實當然痛苦啦，連想喺現場改句對白都好難。」
對慣港式的機靈百變要投入一板一眼的製作模式，Peter一早已學懂為自我釋懷：「其實用心拍嘅話，大片都可以有小品情感喺入面。好似《投名狀》李連杰幾場文戲都係我喜歡拍嘅嘢；細緻嘅情感有血有肉嘅人性，不過同時要兼顧啲我唔鍾意嘅嘢，嗰時諗起要調動800個臨時演員個頭就痛。」雖然對內地題材缺乏自信，但Peter表示近日拍攝新作《中國先生》令他跨過了一重心理障礙，他接着說：「今次拍得好有共鳴，雖然我冇內地80年代嘅生活經驗，但相信情懷都係一樣。」
評審準則情為先
重談第一次擔當國際影展評審，Peter笑言感覺像去了電影夏令營：「以前香港電影節會一早預晒睇邊十幾套戲，但最後都可能因為要做嘢，最多都係睇得三套。今次就係『被睇戲』強迫睇十幾套戲，不過唔使買飛，同時間又可以同一班唔同地方嘅電影人交流，係一件好賞心嘅事，好似約咗班朋友睇戲咁。當然大家睇法有差別，但氣氛好好。我自己評戲會以情行先，主要睇吓邊套電影可以先觸動到我情緒，先再去分析。」
拍港產片心不死
洗腦洗不掉純港式電影，早前彭浩翔的電影《低俗喜劇》還原港產片的基本，創造了亮麗的票房，同樣拍港片出身的陳可辛不諱言有朝一日會重投懷抱，他說：「會，不過一定唔會係為賺錢去拍。拍嘅動機都會係作為保育一種文化同香港精神價值觀。」
致力發掘新血
陳可辛續說：「喺大中華呢個民族意識咁強嘅體系入面，香港價值觀同文化好快消失係意料中事，我哋改變唔到，但係唔代表乜嘢都唔做。往後我希望可以發掘多啲新血，為香港影壇播種，希望本土核心價值透過電影傳承落去，有第二個王家衛、杜琪峯，一代一代傳承落去。」
