公司標誌成片魚翅咁嘅國泰航空，近日宣佈因為魚翅係由非可持續發展方式採購，決定同姊妹公司港龍一齊唔再接受託運魚翅生意，設三個月過渡期。「魚翅」航空呢個決定，令海產業界強烈不滿，業界噚日仲搵咗近200個代表，直踩國泰城抗議（圖），要求國泰撤回有關決定，抗議人士仲幾乎衝咗入去國泰嘅辦公大樓，同在場保安及職員發生推撞。
魚翅行商會主席何兆齊聲稱，國泰唔肯運魚翅，會對海產業界造成數以千萬元計嘅損失，「的士都唔可以拒載啦，何況飛機」，佢最怕社會誤以為進口魚翅係違法，變相「抹黑」業界；又怕其他航空公司有樣學樣。國泰發言人反駁話，如果業界證明到託運嘅魚翅係由可持續發展方式採購，又唔係瀕危品種，就唔會拒運。