私駕路：M系大霸王　孖咇出戰

立法會選舉轉入最後直路，於眾黨派空群而出四圍拉票之際，寶馬Ｍ系力量此時亦派出兩位件頭十足的大霸王參與造勢。輕輕執一執形象的X5M及X6M不但行孖咇登場，還不停喊出凌厲而沉實的4.4公升V8 TwinPower Turbo引擎口號，加埋一藍一白的懾人氣勢，唔派餅都可以拉攏民心啦。　記者：許維雅　攝影：蔡家輝　模特兒：Wiyona @Model One

高性能界別　表現穩重

與其話全新X5M及X6M是出來助選，倒不如話他們是同一張名單參選，為寶馬M系力量於高性能界別爭取更多議席，更何況他們的理念完全相同。兩者同樣配置4.4公升V8 TwinPower Turbo引擎，可以輸出555匹馬力，低至1,500轉便可全數釋出強悍的680Nm峯值扭力，極速高達250km/h，一踩即着的脾氣無變過，火氣一樣咁猛。配合六前速M Sport自動波箱，即使身形龐大，身手也十分敏捷快速，0-100km/h加速只需4.7秒。即使為人比較性急，但工作起上來的表現也十分穩重，全時四驅、DSC穩定系統及DTC動感循迹控制系統等，帶來極穩定舒適的行車表現，加埋Dynamic Performance Control（DPC）動態表現控制系統，一啲都唔似揸緊高身車，當然M系比普通版降低10mm亦是增強入彎穩定原因之一。身形如此大隻，綜合耗油13.9L/100km，每公里約$2.3，未算好大食。

背影相對老實的X5M走穩重形象。

加闊入風口　形象鮮明

兩位參選代表雖然理念相同，但其實憑藉不同外形以吸納不同類型的選民支持。好似長闊高達4,851×1,994×1,764mm的X5M，外形四四方方加五座設計，主力吸納Family Man；而長啲扁啲、尺碼4,876×1,983×1,684mm的X6M，流線扁尾外形及四座設定，主力招攬單身型男支持。論實用程度，兩者的承擔能力都很強，不過高身方尾的X5M略勝一籌，儲物容量達1,750公升，而X6M則有1,450公升。至於內涵，兩者皆跟之前一樣有料，好似泊車視像系統、iDrive連8.8吋LCD彩色屏幕、Head-up Display及原廠導航系統等履歷，名列豪華SUV界別的前茅。為了令形象更鮮明，除了換上全新LED頭燈，今代還加闊了車頭的雙腎形入風口增強霸氣，而X6M則改用跟M3一樣的拱形鋁製頭冚設計。最後為表對黨的忠心，兩者制服皆滿佈M系力量的專屬標記，如波棍、錶板、車側指揮燈及20吋合金輪圈等，而M多功能真皮軚環更繡上淺紅藍雙色線。去到邊，X5M及X6M都行孖咇齊心拉票，氣勢的確吸引不少途人目光，有助M系力量壯大聲勢。