DBC數碼電台噚日下晝開員工大會，公佈點樣撐落去。大班鄭經翰喺會上透露，DBC為削減開支，本月10日打後，將會由家七個台，減到得番兩個，節目主持人亦要減薪，但基層員工薪酬不變。
為咗籌集營運資金，大班計劃推出例如「聽眾100元落廣告計劃」，增加廣告收入，又會研發網頁或應用程式；如果廣告收入可觀，更加會提出回購黃楚標等股東嘅股份；就算迫不得已真係要出售股份，佢都會研究開發網上電台，繼續發聲。
壹傳媒老闆肥佬黎近日去DBC開咪，好多人都問肥佬黎係咪會注資，不過大班噚日就喺DBC嘅facebook發聲明，話好感激肥佬黎借出網絡平台推廣DBC，但講明自己喺股東內訌決裂事件後，唔打算再倚靠財團或者同富豪合作喇。