麻煩友祖爾巴頓（圖）被昆士柏流浪外借到馬賽之後，原來仲未可以上陣；事關呢名英格蘭中場喺上季英超煞科戰，對曼城嘅阿古路施展一記左勾拳，被英足總重罰停賽12場；雖然巴頓已經轉戰法甲，不過停賽令就繼續執行，家仲有9場波監等住佢坐，不過就只限於法國國內嘅比賽。喺嚟緊月中歐霸對費倫巴治場波，巴頓就可以着起件6號波衫，為馬賽首度披甲。