以北上尋歡為題材嘅3D三級片《一路向西》前晚喺尖沙嘴舉行優先場，演員何佩瑜（Jeana）、張建聲同郭穎兒（Celia）等現身撐場。
露點冇老點
全院觀眾戴定3D眼鏡，期待眾女演員震撼拋出3D胸，兩小時3D效果未算突出。不過全場重頭戲係32F蒙牛同張建聲赤祼肉搏戲，好有壓迫感。電影公司仲抵死送觀眾蒙牛奶，畀大家邊睇邊啜止渴。
《3D肉蒲團之極樂寶鑑》被鬧爆假3D，《一》片導演胡耀輝噚日話：「我哋今次改善咗，但拍時冇諗過喺IMAX放映，巨幕太大，投射出嚟會爭少少。」《一》片原著網絡作家向西村上春樹低調撐場，佢噚日電郵回覆力撐：「我給80分，之前講會露點嘅女角都會露點，絕對冇老點，為睇鹹濕嘢嘅鹹濕仔都會好滿意。」
Jeana前晚再被同場低胸向西女搶風頭，佢話留首映先騷本錢。而同場台灣美眉李沐晴整理低胸裙時，疑不慎露點，佢解釋胸口陰影係紋身。