鍾鎮濤（阿B）經歷過破產後一貧如洗的日子，已59歲的他毅然擲200萬出碟，終於讓他用刀仔鋸到大樹，甚至為了舉行巡迴唱吸金，寧願押後明年跟女友范姜的結婚計劃。不過，B哥許諾范姜永遠都坐正做鍾太，自己身邊絕不會出現小三，因為永遠記得落難時女友典賣珠寶，助他度難關。 撰文：皓騫
於02年因負債2億元宣佈破產的鍾鎮濤，曾經窮到足襟見肘，連生活費也成問題，甚至要靠范姜典賣珠寶度日，他日前接受訪問說：「嗰時為咗搵生活費，拍咗好多垃圾片，我唔係扮破產，真係冇水，當時范姜試過賣珠寶支持我，所以家我成日話要買粒『石頭』畀佢，叫我買幾百萬車，我又未有咁揮霍，不如買『石頭』令佢開心，女人仲好鍾意袋，冇靚袋好似冇帶身分證出街，男人都鍾意袋，不過唔係嗰種袋，哈哈！家如果要使錢，我會細路仔排第一，范姜排第二，自己排第三。」
正氣力敵飛來蜢
不過，B哥表示結婚計劃可能要押後，他說：「明年未必得閒結婚，如果開演唱會就結唔到，觀眾梗係鍾意聽我唱歌，唔開驚俾人斬，唔賺錢點結婚，我要儲錢買粒『石頭』等范姜開心，其實結唔結婚冇分別，都係開party啫，范姜屋企冇壓力，我哋只係欠張紙，佢冇爭名份，因為我冇第二個女人，亦冇咁嘅本事，佢一定坐正。」
當黃宗澤和吳卓羲都因小三分手，瀟灑倜儻的B哥揚言身邊從沒出現飛來蜢：「聽講有女藝人會送上門，但我真係冇，可能我形象太鮮明，都唔係嗰啲人，自己都幾十歲，你估仲廿歲咩，我個人太清醒，冇時間冇興趣搞呢啲，咁大個人要諗後果，付出唔成正比，傷害形象、屋企，玩嚟做乜？完全唔值得，所以范姜好放心。」
破產嘗人情冷暖
B哥將新歌《家裡家外》送給范姜，這首歌講兩公婆老了，坐在搖椅上看舊相憶當年：「有時吵鬧係生活情趣，到兒女長大高飛遠走，最後我都係拖住你。」B哥自誇浪漫，范姜聽到好感動；而《你是個男人》就是B哥的經歷：「過去經歷令我學識做人，自己以前由super star跌到谷底，平時入餐廳有經理握手鞠躬，破產後侍應話冇位，嘗盡人情冷暖。」
走過破產令的B哥，是否已賺回失去的身家？他說：「冇咁計，錢只係數字遊戲，好似阿倫（譚詠麟）賺咁多錢，使嚟使去都係面頭嗰浸，家最緊要生活開心，唔使佢（范姜）捱，唔使憂柴憂米。」B哥還鬼馬說：「所以咪要做，唔做邊有錢。」
自資出碟有錢賺
翻生後的B哥並沒有做一個守財奴，反而在唱片業蕭條的情況下自資出碟，8年沒出國語碟的他說：「我唔想一直sell老本唱舊歌，真係好多謝fans等我咁耐。」新碟製作加宣傳費逾200萬元，B哥說：「我係老闆，雖然有贊助，但我越使越大，唔好意思叫人畀多啲，咪自己又投資落去，如果加埋自己酬勞仲唔止㖭。」
現在出碟根本賺不到錢，可是B哥卻自豪說：「我一定賺，拍兩個廣告或幾場商演就返嚟，家接嘅工作已經過咗呢個數，我冇銷售壓力，賣唔到係應該，賣得好就飲得杯落。」B哥選擇推出國語專輯，是否對香港樂壇死心？他哈哈笑說：「冇咁灰，我鍾意台灣樂壇，香港好似只得一個目標，就係喺紅館開演唱會，我喺台灣住過，又係台灣女婿，所以製作都喺台灣做。」
場地提供：HABITU Ristorante the Garden
微整形保青春
現年59歲的B哥，不介意公開年齡，他笑說：「邊個唔知我幾多歲，好在自己DNA唔錯，媽咪80幾歲好健康，有時仲會發脾氣鬧我，但從來唔鬧啲孫。」
獨家養生湯
B哥透露keep弗方法都是做運動、少吃肥肉，還有范姜的獨門養生湯，他說：「佢每月煲一次，飲完成個人都暖，唔知係咪有乜鞭、人參呢，哈哈！」新碟封套的B哥連皺紋都冇執走，十分真實：「人梗會老，做番自己真實年齡嘅嘢，試過內地有人盜用我肖像整容，幫我執到一條皺紋都冇，好肉酸，我冇諗過打botox，但去台灣會做微整形，只係保養，又唔係隆鼻，做完精神咗又靚咗。」
幫鍾懿開告別騷
B哥現有一子三女，他跟范姜所生的女兒鍾懿遺傳了其表演天份，熱愛唱歌，B哥自豪說：「鍾懿好勁，之前佢喺回歸節目同胡總（國家主席胡錦濤）握完手後，中央台都請埋佢同我做中秋節目表演嘉賓，將來我開騷，佢都要跟我做嘉賓。」么女鍾幗早前也跟爸爸拍疫苗廣告，B哥笑說：「等鍾懿讀中學，幫佢開個告別演唱會，鍾幗就接班唱歌。」問是否最錫兩個細女？怕唔怕大仔嘉浚和大女嘉晴呷醋？B哥笑說：「我最錫嘉晴佢哋三姐妹感情好好。」
