外來人說九龍城是個吃的好地方。老街坊呢，沒了城寨的街坊情，沒了精采的飛機降落，沒了接機送機的興奮場面。現在的九龍城，太安靜了點。 撰文：周泇然 攝影：潘志恆
蔡瀾
名食家，九龍城居民，搬來搬去還是最愛這區的美食
以前喺邵氏做嘢，清水灣嗰邊無嘢食，出嚟食嘢，一定要經過九龍城。後來開始熟悉呢區，之後搬來搬去都離唔開九龍城。最鍾意呢度嘢多（食物），新鮮，人人都消費得起。呢度附近都住過，住過亞皆老街，又住過又一村。後來想試吓住港島，有排搬咗過跑馬地，去到街市，買兩條青紅蘿蔔，收我三十蚊，喺九龍城先要十蚊！最後又搬返嚟。到今時今日九龍城啲嘢都仲係平，但係無咗嘅嘢亦多，例如以前有檔叉燒好好，又例如羊城（已結業舊茶樓）啲蒸飯同埋燒賣就好好食，點心都好。我家每朝早都會喺附近散步，有時會自己買嘢整早餐，一星期就有兩三日喺度（街市熟食中心）飲茶。呢間樂園食咗幾十年，由鐵皮屋嗰陣食到家，最鍾意炒米粉，鴛鴦都係一流。有時仲會喺街市附近買嘢拎埋上嚟食，好似今日同幾個朋友食早餐，七點買到八點幾，呢個潮州魚飯，用咗好肥嘅馬友同鯊魚肉，好好食。
Veryan
南角道39號Dog Romance寵物店東主，開舖一年
由細到大都住附近，返嚟開舖覺得好熟悉。細個成日去美東邨（寨城公園對面）買嘢，最記得邨入面有間影樓，我同家姐幼稚園時都喺嗰度影相，啲相仲喺屋企，但影樓就拆咗嘞。呢頭近年開咗好多靚餅舖，我幾乎試勻！餅舖吸引唔少外來人，變相帶到生客。不過講到老字號，豪華到家都仲係排長龍，細個生日，我屋企都係去豪華買生日蛋糕㗎。
鄧成
適雅洋服裁縫兼老闆，於南角道開業逾40年
我呢度開咗幾十年，以前啲客老中青都有，又有學生哥嚟做校服，家得返啲中坑，即係50幾歲嗰啲阿叔。以前九龍城有好多洋服舖，有三幾十間，你問點解咁多洋服舖？咁就要講返40幾年前，嗰時觀塘同西貢未開發，尤其西貢啦，買嘢最近一定係去九龍城，就係咁帶旺咗呢區。家洋服舖得返三間，好多裁縫年紀都大嘞，退咗休，後繼無人，我自己啲小朋友都唔做啦。
梁永強
區內居民，新天地單車舖熟客
細個要幫阿媽賣魚，娛樂唔多，最開心就係阿媽去龍城戲院買一張飛，一家三口一齊去睇，龍城就喺家九龍城廣場嗰個位。又鍾意睇飛機，第一架747飛嚟香港時（70年），唔瞓都要上天台睇，後來無咗飛機聲反而唔慣。細個無錢，食唔起啲咩嘢，最好就係食鳳香園（舊式餅舖），食咩？食蛋糕邊咋！間舖家都變咗超市。近年呢區起咗好多高樓，後生多咗，多咗賣貴嘢嘅地方，九龍城廣場入面都開咗吉之島啦，時代進步，淘汰無乜問題。
蔡師傅
南角道62號旁巷仔理髮師，開檔42年
70年喺度開檔，你話開咗幾耐呀？呢幅牆隔籬就係學校，以前淨係做學生都做唔切！家啲學生得番新移民，都唔幫襯我。以前有城寨，客多好多，我都住喺裏面，拆咗之後我搬咗去將軍澳，同街坊各散東西，其他人搬去沙田、大埔、黃大仙都有，家靜英英，無生意，做熟客、長者多。以前條巷出面仲有檔賣金魚，幾十年前啲人無電視睇，咪買金魚玩吓囉，有電視之後仲有人玩魚咩，兩個檔主後來退休，入埋老人院囉。