作為近排熱門手機，三星Galaxy SIII手機殼除咗選擇多之外，設計亦越見花心思，首選係最貪吃、愛睡嘅加菲貓，與本地的聾貓玩Crossover推出的SIII殼，款式過癮趣怪。唔想太卡通，又有The Cat & The Dog的機殼，睇住貓貓狗狗的大頭樣，愛貓愛狗之人必冧！ 記者：許福合 攝影：楊錦文、譚盈傑 模特兒：Debby@PureModels
加菲貓×聾貓
加菲貓無論係大人同小朋友，都好多人喜歡，卡通動畫中的加菲貓貪吃、愛睡，性格有型，即使係主人都無面畀。這次的SIII機殼，除了由佢擔正之外，仲搵來同樣得戚、自戀及無無聊聊的本地卡通人物聾貓，玩Crossover！作品一共有五款咁多，每款都有唔同設計，各有心思，最喜歡一款白底，加菲貓爬上來，不知又想做甚麼壞事的樣子，勁有趣怪。
這保護套用料同樣不俗，首先邊框唔會刮手，而且好輕身好薄，放入及取出手機時，輕輕拉開就可將手機取出，而且掣位好準確，不會影響按鍵的操作，經常換殼都唔怕刮花機身。
貓狗騷大頭
覺得加菲貓太得戚，亦可留意這款現實派的The Cat & The Dog系列SIII殼，暫時共有四款推出，兩貓兩狗，分別係Poodle、Maltese、American Shorthair及Chinchilla，都係用上珍珠白做底色，再襯上牠們的貓狗大頭照，造型非常可愛。而且殼面使用的印刷技術相當唔錯，相片顏色均勻，像真度非常高；殼側更印上貓狗的種類名稱，拎住來講電話，真係恨死其他貓狗主人！物料方面，使用塑膠原料製作，可防撞及防刮花，放在枱面都唔怕留痕迹。
查詢：
（a）Morgan Power（2827 2881）
（b）Case collection（2838 0928）