鍾建新，49歲，港產藝術家，作品兩度入選香港當代藝術雙年展，前港督彭定康、香港藝術館和香港文化博物館均有收藏他的作品，亦曾為新機場開幕禮設計紀念冊封套。擅長水彩畫的他其實是前PTU警長，當差25年，五年前申請提早退休，耗盡畢生積蓄，以自資方式開設全港首間以自己命名的私人藝術館。4000呎的私人樂園，收藏他過去30年逾百幅作品，本月16日開幕，開放給教育團體參觀。記者：呂麗嬋
「我20歲就當差，做警察係職業；但我嘅事業，我希望係藝術家。自小，好鍾意畫畫，人哋做警察望升職，我都恨，但最享受嘅，係攞晒啲年假，四處去搞畫展。我去過巴塞隆拿搞展覽，當地小鎮有好多畫廊，藝術氣氛一流，回港後，我就夢想，如果有一間鍾建新藝術館，你話幾好？家陣，終於夢想成真。
由零開始自資建藝術館
我退休前駐守新界，屬受保護古蹟嘅粉嶺裁判署係隸屬我哋管轄範圍。嗰時政府話搞保育計劃，我寫咗個萬言計劃書，建議19區搵啲特色建築物，改建成地區藝術館。唔使講，份計劃書最終石沉大海。
政府唔做，就我嚟做。退休前，我已四圍物色地方，五年前，搵到去錦田大江埔。未裝修前，間屋荒廢咗十幾年，爛屋一間，但勝在屋型靚，一入門口，中庭位16呎，天然光透入，一見鍾情。
我哋唔係有錢人，搞呢間藝術館，要傾家蕩產。提早退休攞到嘅60萬退休金係我同太太畢生嘅積蓄，兩邊家庭都有幫手。要成就夢想，唔係我一個人嘅事。好多人話藝術家好清高，但藝術家都要搵食。做多十年，我筆退休金有成200萬，早退，只有60萬。呢筆數，好多人識計，但當你計得太多，就乜都唔會做。
警察工作中尋畫畫樂趣
對錢，我梗有概念。我喺粉嶺鄉村長大，爸爸係雞農。小時候家境好，搞農場、有工人。後來爸爸生意失敗，慘到要去做泥工。我係四兄弟姐妹中嘅大仔，梗要幫手。中五畢業，原本去做廣告設計，嗰時月薪1000蚊，後來朋友話，你會考七科合格，做警察，薪高糧準，如是者，一做就做咗25年。
做警察同做畫家，好似風牛馬不相及，但其實未必。我試過去邊境禁區部署一單掃毒行動，人人要搵地方掩藏，我就大模廝樣攞住畫板扮寫生！行動前去現場踩線，唔方便影相，我就負責重繪通道結構圖！呢啲都係陀槍以外嘅經歷。與其自怨艾乜?都做唔成，不如搵吓當中嘅樂趣，條條大路通羅馬，係咪？