樓價居高不下同政府硬推國民教育，令到香港怨氣越來越濃，恒生銀行（011）一姐李慧敏（Rose姐）唔知係咪見到咁，上場後頻頻帶住正能量出嚟見人，噚日拉埋陳力生同馮孝忠兩位高層介紹「十大再生勇士選舉」，呢次已經係佢上任四個月以來第三個社企責任活動。
唔講唔知，今年5月中返工嘅Rose姐，第一次以恒生一姐身份見人，就係社企責任活動，去咗體育學院送插畫，為一班香港奧運同殘奧運動員打氣。佢7月中再出席「協助警方撲滅青少年罪行比賽2012」，噚日就介紹「十大再生勇士選舉」。數數手指，Rose姐每隔兩個月就有一個社企活動，下次會唔會喺11月再見人呢？
Rose姐噚日喺儀式後又使出無敵「四萬」笑容同一班再生勇士雞啄唔斷，確實為社會帶來多少少正能量。