梁振英本來已經執好行李準備去俄羅斯出席亞太經合會議，點知突然間話取消行程，留港處理公務，唔使問阿貴，梗係阿爺叫佢唔使去啦！前晚見到佢離開特首辦返家時木無表情，以及翌日上班亦冇嘢講，就知道佢好冇癮。沙膽虹相信他前晚分分鐘失眠，左諗右諗究竟阿爺係咪唔鍾意佢？係咪有Plan B？至於阿爺有乜嘢原因叫佢唔使去，是否因為佢處理國民教育事件搞到一鑊泡？沙膽虹覺得，梁振英最大問題就係漠視民意。超過五成人叫劏房局長陳茂波下台，他不聽；就連九萬人上街、四萬人政府總部集會、馬拉松絕食、晚晚過萬人佔領政府總部反對國民教育，他都執意推行，以為緊跟北京意旨辦事就冇死。如果咁樣都可以做特首，就唔使梁振英，求其喺街搵個都得啦！阿爺叫你做乜就做乜，完全唔識睇形勢執行！肥佬黎叫沙膽虹做乜做物，沙膽虹都唔會百分之百跟足，覺得會引起同事反彈的亦會勸肥佬黎唔好制，難道出咗事時跟肥佬黎講，又係你叫我咁做嘅，唔俾肥佬黎鬧「我叫你去死，你唔好去死」才怪！梁振英日前仲儍更更出嚟講，撤回跟唔撤回中間有好大空間，可以慢慢傾，但唔可以用撤回作為談判起點。首先，A及Not A中間根本冇空間，況且，梁振英把話講死，話不可以撤回作為談判起點，他現在如何收拾殘局呢？自掌嘴巴撤回國民教育？死拖下去讓政府總部長期被佔領？沙膽虹