國家副主席習近平突然唔見美國國務卿希拉莉，有人估計同政治局常委嘅矛盾有關，消息令晉佳打個冷震，有稍為熟悉內地政局嘅朋友話，今次可能係大驚小怪。晉佳唔係政治專才，無謂亂估，寧願信市場反應，恒指前日跌近300點，噚日略為回穩，唔算恐慌性拋售，睇嚟有可能係虛驚一場。
睇番恒指9RSI已跌到30樓下，短期可能會喘定，暫時只需要提高警覺，未去到政策不明朗令大家要沽貨嘅時候。消息面令人驚青，但簡單比較吓5月同近期嘅跌市，可見呢浸下跌速度比5月慢，暫時唔似好差。
近排好多強勢績優股嘅股東都配股套現，係因為知道後市有問題，要沽？定係覺得後市OK，要套現買低殘股？姑勿論動機如何，今年已經升得多嘅績優股，隨時有配股質低股價嘅風險，短線係唔係都要小心啲。
買股又要避開有配股憂慮嘅股份，又要穩穩陣陣輸唔死，可以留意吓安碩A50中國（2823）。唔經唔覺，A50已經跌到去9蚊邊緣，9RSI曾經喺20水平徘徊幾日，罕有地嚴重超賣，然後RSI開始回升，但股價仲喺度跌，形成咗短線RSI底背馳。另外，A50相對每股資產淨值溢價收窄到2.1%，溢價比之前下降，根據過往經驗，係中線利好因素。基本因素都費事多講，係人都話平，但長期係咁跌，講到尾，都係信圖表好過。
現價可買 睇升一成
由於A50價格表現，理論上同內地A股掛鈎，所以冇乜技術走勢陷阱嘅蠱惑嘢可以出，形成技術嚴重超賣，已經係可靠嘅買入訊號，呢個位買佢最多捱一陣價就見底，所以可以家就買。
如果睇圖，今年3月底至4月頭，A50做過一個短線9RSI底背馳；股價由低位回升到高位，改善超賣，但升幅唔夠一成。不過，A50喺5月頭到家跌幅達到兩成，比起3月跌幅約一成，累積跌幅更大，技術指標更加超賣，相信今轉反彈向上幅度會比4月大，目標至少有一成，去番10蚊實在唔困難，見步行步，市況若轉旺，分分鐘可睇11蚊，至於見有第一棍恐慌性拋售就要止蝕，總括嚟講，A50係近期穩陣嘅選擇之一。
晉佳
本欄逢周一、三及五刊出