82歲老人奇連伊士活在美國時間八月三十日晚上於共和黨全國大會上之「發言」（或稱自言自語），轟動全美，成為互聯網上之「瘋傳」，YouTube hit爆燈：美國政治評論家認為搶盡羅姆尼風頭，扯開晒美國人之注意力，對羅姆尼不利，共和黨內部好多大老紛紛指責羅姆尼競選辦公室人員辦事不力，走漏眼，事先竟然冇睇過奇連伊士活嘅講稿就俾佢講。美國政治就係成王敗寇，沒有甚麼黨領導人在後面統籌策劃，總之邊個贏咗初選，成為總統候選人嗰位就話晒事，其他人統統靠邊站，候選人嘅團隊統統主管一切，故此今次共和黨大會就係羅姆尼大會，佢一早聘請全國一流嘅政治公關、電視節目製作人為佢策劃每一個大會環節，所有上台演講人選由競選辦決定，所有講稿及事先綵排由競選辦審核監管，時間長短要配合電視台直播。咁嚴密控制下，點會有差池？哈，就係因為奇連伊士活在芸芸荷李活大名人之中，堅決支持羅姆尼嘅，大部份明星導演都係自由派、係民主黨擁躉，故此羅姆尼私人邀請奇連伊士活以神秘嘉賓身份出現，一切保密，事先冇綵排，大家諗住老人家企出去講五分鐘，為羅姆尼打氣，已經足夠。及至伊士活要搬張櫈出台前，工作人員仲以為係老人家自己要坐低先至講，怎知道伊士活對住張空櫈自言自語，臨時爆肚，當空櫈上有奧巴馬坐響度，與佢對話……事後荷李活及自由派人士對奇連伊士活惡評如潮，話佢似足一位飲醉酒嘅老坑自講自話，連美國失業人數都講錯咗係二千三百萬（按：勞工部數字係一千二百三十萬），總之就係一片嘲諷之聲，普遍認為羅姆尼失策無能。但係，左丁山以為，因為一般美國人對數字其實不甚了了，大明星講二千三百萬人失業，經澄清係一千二百三十萬人，數字廣為流傳，反會令美國選民對失業人數、失業率更加清楚，怪罪奧巴馬，突出咗高失業率係奧巴馬爭取連任嘅大障礙。其次，奇連伊士活有句說話引起滿堂采，就係我地（we）擁有這國家，政客只是我地嘅僱員，佢地做得唔好，唔該走人！幾時有位中國大明星膽敢在中央電視直播時講呢句話，中國有希望了。