壹傳媒老闆肥佬黎真係惹火人物，噚日走去DBC數碼台烽煙節目《風波裡的茶杯》做嘉賓主持，唔少聽眾打電話上電台挑機。
擔心香港道德崩潰
肥佬黎直認不諱有目的，就係呼籲巿民喺立法會選舉投畀民主派，佢喺節目內重申今次選舉好重要，擔心泛民輸咗，政府一定唔會撤回洗腦國民教育，香港道德就會崩潰。佢一度哽咽話，希望所有人都要出嚟投票畀泛民，若然泛民失守，狼振英就可以為所欲為。有聽眾亦問肥佬黎點解話人民力量唔係民主派？佢話會為言論負責，但唔會喺電台回應；大班補充選舉臨近，為咗公正唔會喺電台講呢件事，認為踢走保皇黨嘅就係民主派啦。其實劉夢熊Dream Bear既然咁想講嘢，不惜向陳惜姿同黃之鋒下「戰書」，約定今晚喺政總廣場公開辯論國民教育，查實都可以考慮去DBC開咪喎。