台灣女子組合S.H.E三個成員裏面，Selina同Ella都先後結咗婚，剩番Hebe仲未嫁得出！雖然Hebe曾經同周杰倫傳過緋聞，但近年喺佢身邊出現，獨沽一味都係女仔，早輪就同張惠妹執行經理人鍾若涵出雙入對，上月16號又換畫，跟所屬華研公司女同事「小廖」廖慧呈去河濱浪漫，之後孖住返香閨黐纏13粒鐘。
儼如孖公仔
嗰日小廖去到Hebe屋企，冇耐兩個就揸車去迎風河濱公園漫步，一身黑衫冇化妝嘅Hebe星味全無，仲主動捉住小廖嘅手臂，小廖就幫佢按摩後頸，動作鬼咁親蜜，Hebe一時興起仲玩單槓，可惜臂力唔夠，小廖即刻親自示範，喺Hebe面前攞足威，之後兩個就返咗Hebe香閨，共聚13粒鐘後，小廖同Hebe第二日前後腳離開，不過到下晝佢哋又孖住去眼科，黐到實。
有記者問華研回應，發言人例牌否認話小廖以前係Hebe助理，後來調咗做其他工作，但兩個一直係好朋友，斷背傳聞得啖笑喎。
撰文：丁寧
