過去兩個月，大家看到了一個怎麼樣的香港？只懂聽命中央的特首，與拒絕聆聽民意的政府；香港人在香港，原來沒有話事權，「好在我哋仲有選票、仲有唯一發聲機會」，前政務司司長陳方安生呼籲市民，9月9日為下一代投下兩票，「除非我哋容忍到，梁振英班子可以喺建制派縱容下為所欲為」。
看着怪獸與妖魔結盟，香港走上末路開端；陳太與不少市民一樣對前景憂心忡忡，悲憤之時卻深信，市民並非絕無斬妖除魔的能力，手中的兩票，就是武器。
「我都好明白，有啲人對新增嘅超級區議會議席唔係好認同，覺得始終係功能組別議席，但起碼呢五個議席，係畀到全港300萬市民去投票，獲選入去（立法會）嘅議員，會有好大嘅力量去影響政府……如果喺呢度投咗白票，其實等同投咗畀建制派，畀更多建制派議員喺立法會內，縱容梁振英嘅惡行。」
別以為陳太不知道，部份泛民支持者對民主黨挺政改方案既失望又氣憤，「我當然知道，有啲長期支持民主黨嘅人，對佢哋支持政改方案好失望，但失望又好、無奈又好，既然已成事實，大家就要向前看，睇吓點樣為香港先最好。大家想9月之後係建制派稱王、抑或泛民可以代表市民發聲？關鍵就在於市民手上呢兩票，冇理由要自動放棄呢個權利。」
確實，社會上有不少人認為，梁振英才剛剛上任，理應給他一段觀察期，不要以60日定他生死；但過去兩個月卻證明，時間並非問題，態度才是關鍵。陳太直指：「無論特首以及政府，過去兩個月都表現得非常之差勁；唔可以好好管治，誠信又受質疑；民意當然冇聽到啦，一國兩制更加越嚟越模糊。」
陳太信手拈來的例子，多不勝數：企硬推銷國民教育、不敢在擴大內地自由行問題上向中央說不，助長中聯辦肆無忌憚干政，「喺呢啲問題上，梁振英做咗啲乜？大家已經睇到，呢個政府根本冇管治能力，對市民訴求亦無動於衷，成個班子都係講關係同背景，邊度係講才能？」
立法會若能好好把關，自能制止梁振英胡作非為，防止香港變成「紅海」。「事實上立法會真係要做好把關角色，泛民一定要保住24席，冇咗議會否決權，23條、國民教育就一定會推，2017年同2020年可唔可以普選，亦都繫於呢一戰……我哋如果想我哋下一代仲好似我哋咁，有空間去捍衞核心價值，就要為下一代投下呢兩票。」
投票之時，陳太叮囑選民記緊「帶眼識人」：「有啲隱形建制派，家梗係話唔支持政府㗎，但係一選到，就肯定會變番保皇。」
要慎防的，還有只懂空喊口號的候選人，「未來四年係一場硬仗，我哋要嘅係高質素嘅議員，民主黨同公民黨等泛民主派議員，都好有審議法例嘅工夫，唔會終日只係企喺議會度大叫大嗌，佢哋入咗立法會，肯定會盡忠職守，分工合作制衡政府都容易啲……大家一定要睇得清清楚楚，邊個係真正嘅民主派。」
《蘋果》記者 許偉賢