早兩日跟股友吹水，佢話自己重注兩隻股票，目前股票A賺1成，股票B輸緊1成，但睇唔通個市，想減啲貨，問魏力應止賺定止蝕？有錢賺咗先，輸緊就坐多陣，博日後返家鄉，相信係大部份散戶的做法。
止蝕是痛苦的，但試想你買股票，都是覺得佢平先會買，若然入貨後股價好快跌一成，經驗所得，好大機會係睇錯方向，若不及時止蝕，再跌機會將遠高於反彈，溝淡後果更不堪設想。假設股票跌了五成，蟹貨一街都係，要升1倍先返家鄉，談何容易？
相反，貪小便宜「食糊先講」，便放棄讓利潤滾大機會。以早排分析過的南聯地產（1036）為例，假設戰友10蚊入場，買1萬股，成本10萬銀；昨收16.42元，持股升值至16.42萬，再升10%的話，以本金計就升值16%，賺錢變相容易了。
市況慘淡難揀股，幸運地買中一隻，如本欄4月推介的安東油田（3337），當時才1.20元水平，昨已漲至1.84元，坐貨4個多月利潤五成。試問日日短炒，扣除使費，有誰敢說4個月能賺五成？中資電訊、燃氣及石油設備持續強勢，坐得安心、兼有突破之勢的股份，可留意中國電信（728），穩守250日線之上，近日成交漸增，有蓄勢向上味道。
魏力
http://www.facebook.com/2012jason