選舉真係千奇百怪，點估到連「選舉色戒」都有？選情同對手咬緊嘅民主派資訊科技界候選人莫乃光，近日遇上兩宗「女色」怪事，幾乎中招成為桃色醜聞男主角，相信都同選舉有關。Charles日前喺九龍塘生產力促進局同選民聚會後離開，有個女人喺後面急步跟住，Charles直覺唔對路，特登兜路走，點知個女人繼續尾隨，仲突然喺佢後面大叫一聲「先生」後即時扮暈，似乎想投向Charles嘅身軀，好在佢覺得事有蹺蹊，寧願拔足而逃都唔英雄救美。
女疑人掂腰問路
另一次佢去到數碼港商場附近，突然feel到有個女人從後掂佢條腰，個女人仲喺佢耳邊細聲問：「先生，呢度附近邊度有餐廳？」Charles個心當堂凉咗半截，即時盤算若然佢一擰轉頭答嗲，遠方就會有相機狂影，到時水洗都唔清，所以頭也不回就走咗。有鑑於此，Charles未來幾日盡量同男、女助選團同行，以免俾人設陷阱大做文章。咁又係，雖然佢嘅對手譚偉豪攻勢強勁，獲大型電訊、軟件公司大老闆助選，但Charles都唔係冇勝算；如果因為誤墮桃色陷阱而影響選情，認真唔抵。mailto:[email protected]