音樂人莊冬昕因作《食軟雪糕》而為人熟悉，此歌更被網民戲稱為「膠歌」，估不到他養的唐狗Blackberry亦頗膠，遇賊也不理。以前莊冬昕住村屋被賊入屋，Blackberry見開了門就走上山玩。
撰文：黃曉妍
莊冬昕憶述當年領養唐狗Blackberry的經過，在西貢愛護動物協會看到Blackberry，當時牠剛剛出生三星期，很細隻，他很喜歡，本想翌日領養Blackberry，可惜被一個外國家庭快他一步。
超乖習慣自由
約三個月後，莊冬昕在灣仔愛護動物協會，竟然見到一隻跟Blackberry一模一樣的，無論名字、眼神都很相似，向職員細問之下，原來就是他的最愛Blackberry，莊冬昕說：「原本佢喺西貢俾一個外國家庭領養，點知佢哋要返外國，所以將Blackberry送返去愛護動物協會，我知道即刻領養Blackberry返屋企，太有緣份。」
將Blackberry帶回家一起生活，莊冬昕體貼地細心教導愛犬，加上唐狗特別易教，既乖巧又嗲人，甚得莊冬昕歡心，不過他卻埋怨自己少時間照顧愛犬，他說：「每朝同夜晚都會帶佢落街，因為Blackberry唔會喺屋企去廁所。其實我對佢都唔係太好，我要做嘢好少時間陪佢，但佢超乖，唔會發脾氣，就算佢自己喺屋企，我都唔需要綁實佢，佢自己喺間屋走來走去，唔會咬嘢同搗亂。」
有沒有想過為Blackberry配種？莊冬昕說：「喺愛護動物協會領養，Blackberry已經做咗絕育手術，我覺得好可惜，如果可以嘅話，我好想幫佢配種。我曾經喺街上遇過Blackberry啲親戚或者兄弟姊妹，因為我見到佢哋心口都有撮白色毛。」
講到趣事，莊冬昕講到笑不攏嘴，皆因Blackberry不怕陌生人：「我以前住西貢村屋，有次俾人爆格，開咗門之後，Blackberry就走咗上山玩，佢冇理啲賊，可能啲賊餵Blackberry食嘢，我返到去見Blackberry仲好開心。不過佢好得意，佢好驚黑色皮膚嘅人，Blackberry會耷低頭匿喺我後面，但係佢慢慢就冇事。」
住狗酒店肚屙
好多人都認為狗很懂人性，會知道主人開心還是不開心，莊冬昕開心地說：「我唔開心，Blackberry會更加嗲我，佢成日陪我寫歌，我寫完就會捉住佢跳舞。我首歌《怪叔叔跳古怪舞》開頭係sound effect，我用咗嚟做電話鈴聲，Blackberry每次聽到就跑嚟搵我。」
Blackberry是莊冬昕人生中第一隻寵物，所以對牠照顧得無微不至，他更寄語朋友說：「養狗係一個好大嘅負責，有朋友見到Blackberry好得意，話好想養，我勸佢哋如果單身就唔好養，因為冇時間陪隻狗，隻狗會好慘。」莊冬昕表示免得過也不想將Blackberry送去狗酒店：「Blackberry有次喺狗酒店返嚟，屙咗幾日，可能佢驚啦，所以我都好少出埠，而且我成日都想帶Blackberry返工，但我好驚，成日聽到有人話將老鼠藥放喺街上害狗，我好擔心Blackberry會食到，因為我朋友隻狗食咗少少就死咗。」
毋懼狗寄生蟲
對於早前有報道指香港大學微生物學系發現由蚊叮狗再叮人傳播的新品種寄生蟲，命名為香港型惡絲蟲屬。莊冬昕坦言看到報道，有一秒的擔心：「冇得驚咁多，Blackberry好健康，冇乜嘢，我唔使驚。」會否定時帶Blackberry看獸醫？莊冬昕指Blackberry很健康，只是打疫苗時才找獸醫。