周星馳舊愛于文鳳日前入稟高等法院,向星爺追討7千萬元佣金同顧問費,呢單審死官未開審,但于文鳳唔知有心定無意,喺佢篇入稟狀度過咗星爺一棟。喺稟狀度,于文鳳以星爺前女友自居,話佢哋97年相戀,拍拖13年,至前年分手。馮仁昭翻查資料,星爺97年仲同莫文蔚(Karen)拍緊拖,換言之星爺嗰時疑似一腳踏兩船喎!
Karen同星爺嘅緋聞,由95年拍《西遊記》開始傳,之後星爺嘅《回魂夜》、《食神》、《算死草》、以至《喜劇之王》都有Karen份演,雖然佢兩個冇承認過呢段戀情,但已經係公開秘密。
不過,98年星爺突然同于文鳳傳緋聞,除咗拍拖食飯之外,女方又跟男方返家過夜,搞到Karen超冇癮。不過當時佢死撐話唔會嬲,仲叫記者畀個嬲星爺嘅原因佢!照咁睇,星爺當時一腳踏兩船嘅機率都唔細,加埋由于文鳳口中踢爆,可信度就更高。
朱茵自爆受害
事實上,星爺疑似一腳踏兩船都唔係首次,星爺舊愛朱茵08年接受《志雲飯局》訪問,自爆拍《西遊記》時,返酒店房搵男友,點知房裏面有個女人,雖然佢冇開男方姓名,但好多人都估係星爺嚟嘅。