呢排中港政壇立立亂，習近平突然喺中美高層會議玩失蹤，令人震驚同疑惑；另一邊廂，狼英上任兩個月已經處處火頭，為咗執手尾仲臨時取消出席APEC首腦會議。老實講，國民教育明明係政府霸王硬上弓，家竟然玩扮讓步博同情；白表免補地價買居屋政策，搞到樓市火上加油，佢噚日又嚟一招港人港地政策，非港人港地隨時又炒到飛起，佢一路講，雨就越落越大，證明天怒人怨。狼英政府我哋冇份揀，所以更加要珍惜嚟緊星期日立會選舉兩票，務必踢走保皇黨、建制派呢啲牛鬼蛇神！
噚日講開智能手機設備股有勢，推介嘅舜宇（2382）進賬2%，另一隻專做手機保護外殼嘅嘉瑞（822）走勢更勁，抽高8.8%並破旗而上，收報0.87元，假設今年末期息有34%增長（參考舊年數據），則2012年股息率將達8.4厘，為股價提供動力，以年度化市盈率11倍作目標，股價可見1.03元，潛在升幅18%。
唐牛