9月學生要返學，但亦有學生要返工，仲要係「被實習」式返工。內地傳媒早幾日報道，江蘇省淮安市幾間大學或技術學院嘅學生，一開學就要去富士康（2038）淮安工廠「實習」，學組裝蘋果手機數據線。
富士康畀足工資
有血汗工廠之稱嘅富士康，雖然話請實習生，但呢批實習生每月基本工資係1550人仔，另有加班費，工資標準同喺市面請一般工人相同。照咁睇，富士康唔係請廉價勞工，似乎係佢喺淮安間新廠請唔夠人開工，要向大學生埋手。
有錢又唔等於人人想做，有讀大學二年級會計系嘅學生反映，組裝蘋果手機數據線係流水作業，佢唔想做，但「實習」同學校學分掛鈎，佢怕畢唔到業，惟有照「實習」。江蘇省教育廳知道件事已經介入，話非專業學生已經全部返回校園喎。咁即係仲有批專業學生繼續實習，繼續做血汗工人？