懷有12周身孕的湯盈盈，前晚瞞住未來老公錢嘉樂，穿上五吋高踭鞋在陽明山莊出席晚宴。盈盈透露BB在肚內經常郁手踢腳，似足嘉樂咁好動。對於姊妹們揚言要玩盡一對新人，盈盈即為嘉樂求情說：「希望佢哋手下留情！」
湯盈盈、苟芸慧、黃德斌及應屆三位港姐等前晚在陽明山莊出席明珠台「Together We Win 2012」晚宴，穿上五吋高踭鞋的盈盈在大合照時，被不平的地面絆了兩次，令人一額汗。問到可獲嘉樂批准？盈盈哈哈笑說：「佢唔知呀，今日要開工，其實剛才行落樓梯時都有少少驚，但我問過姑娘話冇問題。」
百厭B郁手踢腳
盈盈透露已懷孕12周，前日到醫院照超聲波，她自言感覺好神奇，她說：「BB好得意，見佢手仔郁，又會踢腳，彈吓彈吓咁。」被取笑BB打醉拳？盈盈反應甚大說：「我戒咗酒好耐嘞！」
盈盈表示下月才知道BB性別，但笑言會忍口唔公開：「就算狗仔隊偷影我買BB衫，我都會一手攞住藍色，另一隻手攞粉紅色。Toby（梁靖琪）仲教我結婚切蛋糕時，切朱古力代表男仔，切士多啤梨就女仔。」
憂姊妹玩謝老公
盈盈透露仍未定婚期，她因體重超標，至今仍未揀定婚紗，她說：「醫生話正常重三至五磅，但我家肥咗八磅，佢叫我唔食澱粉質，但我食完又肚餓。遲啲休息，我都唔想留喺屋企做女王，怕越嚟越肥。」
盈盈最擔心在婚禮上被姊妹團玩，她說：「我啲朋友話我特登有咗，家轉玩嘉樂，嘉樂問我會唔會玩到佢黑面？我都擔心，希望姊妹手下留情。」盈盈稱計劃拍攝大肚寫真留倩影：「我會唔着衫影，一家三口都係好提議，但想搵德斌做替身，key嘉樂個頭上去，哈哈。」
採訪、攝影：黃曉妍