政府一句起動九龍東，竟然吸引一向係「撈底王」嘅星級漫畫家馬榮成入市，高追工廈樓花，佢最近用7351萬買咗觀塘鴻圖道35號天星中心嘅頂層複式單位，面積9246方呎，加個200方呎空中花園平台，呎價7950元，創工廈物業新高價。
馬榮成7月喺鰂魚涌買咗東港中心一個低層單位，連同早兩年喺同一幢物業買入嘅另一個單位，佢嘅工作室總面積已經差唔多有5000呎咁多。做成呢單生意嘅中原代理梁志峰話，馬榮成想擴充業務，先至大嗱嗱七千幾萬高追觀塘呢個樓花。當然，佢亦睇好九龍東嘅發展前景，政府話要將呢區打造成第二個CBD（核心商業區）吖嘛！講番呢幢樓花工廈，最快明年底落成，馬榮成之外，張學友間經理人公司天星娛樂及有關人士早排都攞咗超過兩億掃咗七層，仲擸埋幢大廈嘅命名權。呢幢樓認真吸「星」：星級漫畫家同歌星！