犯太歲嘅李嘉誠今年果然多阻滯。和黃（013）同李嘉誠基金會上月底宣佈，中止「翻兜」以色列電訊商Partner，點知前日俾賣方，即係當地財團Scailex同Suny Electronics發信投訴，話李生咁做係違約！
話買唔買 或要上庭
賣方指雙方當初訂落嘅合約仍然生效，李生唔可以就咁走咗去，仲要佢為今次事件對公司同相關人士引致嘅損失負責。和黃發言人就堅稱，按協議權利中止收購，唔使畀「分手費」 ，將來會喺法庭全力抗辯。和黃今年喺電訊業方面嘅收購算係諸事不順，其他唔講，淨係2月落實以124億「翻兜」奧地利Orange，就一直等緊歐盟委員會審批，搞到董事總經理霍建寧之前公開發牢騷，批評委員會嘅要求唔合理，審批進度係「令人痛苦地慢」。