基斯坦奴朗拿度（C朗）唔開心嘅原因眾說紛紜，好多傳媒都話同錢有關，佢希望續約加人工，但C朗透過Twitter澄清，堅稱唔開心同錢冇關。
C朗喺Twitter話：「我感到唔開心，公開講出我嘅感受，結果引起軒然大波。我被指貪錢，但時間會證明呢個唔係事實。我想向皇馬球迷承諾，我嘅熱情、投入同對勝利嘅渴望，係唔會受影響。」
唔少皇馬隊友都出嚟話好錫C朗，好似艾比路亞咁講：「每個人都有煩惱，佢都有自己唔開心嘅原因，我會幫助佢，因為我哋係朋友。」卡卡亦話：「C朗得到成個更衣室嘅支持，佢想要幾多就有幾多！」被問及C朗嘅風波，美斯就話單嘢唔關佢事，叫記者唔好問佢。
另外，西班牙《馬卡報》列咗球壇十大高薪球員出嚟，原來踢到曉飛嘅C朗只係排第10。我求大俠覺得以C朗嘅實力，皇馬加少少人工畀佢都唔過份吖；不過就有當地傳媒指，皇馬因為賣唔走卡卡，所以加唔到C朗人工喎。