壹傳媒老闆肥佬黎噚日突然現身DBC數碼電台，同「大班」鄭經翰握手一笑泯恩仇，唔少人起哄譁然，乜佢兩個唔係有牙齒印咩？點解會冰釋前嫌？
哦，原來同狼英有關。肥佬黎向八方揭開謎底，話今次立法會選舉對香港民主未來好重要，所以決定放下成見，主動搵大班合作，希望幫泛民打贏呢場硬仗。佢未來兩日會喺大班台開咪，拍住大班一齊做節目。狼英大敵當前喎，肥佬話就算大家之間有乜不和，都應該打贏9月9日呢場仗先再算。
《爽報》開台 繼續發聲
大班台經營有困難，肥佬黎當然有留意，佢撐大班講好多嘢都係為咗香港人，為免呢把聲音從此消失，計劃喺《爽報》開一個平台，俾大班繼續發聲。佢話《爽報》係多媒體平台，有聲有畫，淨係Apps都有80幾萬人下載；如果聽眾一click入去，可以聽到又睇到大班做節目，大家話幾好呢？肥佬覺得呢個嘗試如果成功，DBC就唔怕冇人注資啦。
睇見肥佬黎同大班和好如初，八方諗起魯迅嘅詩句：「度盡劫波兄弟在，相逢一笑泯恩仇」。咁同人民力量有冇可能一笑泯恩仇？肥佬黎話人力對住泛民，好似對住殺父仇人咁，背後動機又有問題，仲收左派資助。既然唔係同道中人，又使乜和解？
壹傳媒近日盛傳會出售台灣印刷業務，八方同唔少同事都想知道香港有冇新動向？肥佬黎實牙實齒話香港唔會有影響，至於台灣嘅洽售，佢就唔方便多講喇。
mailto:[email protected]
