呢版係投資版，星期日嘅選舉睇落唔關呢版事。不過當我諗起由領匯（823）到恒生（011），由田生（183）到中電（002），由有線寬頻（1097）到載通（062），由數碼通（315）到卓悅（653），好多企業嘅盈利，甚至能否繼續存在，呢次立法會選舉都好重要。
反對最低工資立法
首先講九龍東。肯定係一票獨投謝偉俊。點解？我哋香港可以喺一次又一次嘅世界危機中成為經濟奇蹟全人富起來，係因為勞動市場有彈性不斷變，最低工資就係會滅掉呢種轉工轉行嘅動力。咁喺呢條背信棄義嘅最低工資立法時，得一票反對，就係謝偉俊。所有有良知嘅九龍東選民，呢票我哋係欠咗謝偉俊。仲有如果你係九東選民，選舉後我問你：「投咗邊個？」你千祈唔好答係黃洋達，因為我一定會話：「偉大！自願做契弟。」講港島。我信單仲偕，佢覺得市場、你我嘅決定，遠比政府、議員更應尊重。唯一係佢名單後面嗰啲好多係深信馬克思嘅廢青，所以如果你覺得民主黨有得救嘅就單仲偕。你覺得冇得救嘅就葉劉淑儀。九西。呢個難，我個人係鍾意毛孟靜，佢會係個出色嘅代表，不過我過唔到佢係公民黨嗰關。黃毓民亦真係完全履行四年前競選承諾，佢反加煙稅同拉布拖計劃營商法時我真係拍爛手掌。佢亦係個愛子深切嘅好爸爸，所以如果你頂得順公民黨嗰種味就毛孟靜，如果唔係就再一票獨投黃毓民！新西。個個唔係想打劫納稅人嘅賊，就係癲嘅。呢個區冇人揀得落。新東。原本同新西一樣，都係諗住冇人揀得落。連我朋友何民傑都唔想揀，原因係政府唔聽佢嗰一票話要推翻現有禁煙條例時點先？佢話會全力反政府，我話係咪on record先？點知佢真係喺選舉論壇度話政府淨係加多次煙稅後，會餘下任期所有政府方案都投反對票。唔使諗，做煙民一定係一票獨投何民傑。最後，超級區議會功能組別。老實講，係應該投畀馮檢基。點解？喺年初特首選舉破壞派初選時，聽馮檢基講嘢好似時光倒流去97年嘅世界。當年，破壞派、建設派同獅子山學會信嘅經濟政策冇乜分別，馮檢基係最社會主義，吓吓都要政府增加開支。
馮檢基最社會主義
15年來，民主黨快速向左走，而馮檢基對自己支持多年嘅政策有信心，所以企硬冇似長頭草咁跟風轉方向，所以已經係最右嗰個，即係政府增加開支，不過唔好阻住市場運作呀！不過，我本人係會投白韻琹，因好佬怕爛佬，爛佬怕潑婦，四年前支持飽讀詩書嘅爛佬，四年後投應係最empathetic嘅候選人。天佑香港呀！（編按：九龍東候選人有下列名單：梁家傑、黃國健、陶君行、嚴鳳至、胡志偉、陳鑑林、謝偉俊、黃洋達、譚香文。港島區候選人有下列名單：陳家洛、曾鈺成、葉劉淑儀、劉嘉鴻、勞永樂、何秀蘭、鍾樹根、單仲偕、王國興、劉健儀、許清安、吳文遠、吳榮春、何家泰。九龍西候選人有下列名單：黃以謙、黃碧雲、譚國僑、黃逸旭、蔣麗芸、黃毓民、林依麗、梁美芬、毛孟靜。新界西候選人有下列名單：譚耀宗、梁志祥、麥美娟、陳恒鑌、陳強、李永達、陳樹英、郭家麒、陳偉業、李卓人、梁耀忠、曾健成、麥業成、何君堯、陳一華、田北辰。新界東候選人有下列名單：梁國雄、葉偉明、劉慧卿、梁安琪、龐愛蘭、葛珮帆、陳志全、邱榮光、陳克勤、張超雄、蔡耀昌、范國威、田北俊、黃成智、湯家驊、何民傑、龐一鳴、方國珊、陳國強。超級區議會功能組別候選人有下列名單：何俊仁、涂謹申、白韻琹、劉江華、馮檢基、李慧琼、陳婉嫻。）孫柏文獨立股評人 http://facebook.com/shuen本欄逢周二、四刊出