無綫（電視廣播，511）無聊劇多，但都偶有佳作。最近重播《絕代商驕》，搞到菲菲睇埋先肯瞓，黑眼圈大過熊貓。套劇吸引在於借黃子華式喜劇，解釋商業理論，好似黑天鵝效應、合理化煙幕之類。最爆係前晚嗰集麥提爽（子華劇中角色）教炒股！佢話：「財經佬講嘢係間接啲，佢叫你大手買入，佢真正意思係叫你買少少；佢叫你買少少，即係話唔好賣；叫你唔好賣，即係叫你沽；叫你沽，真正意思係沽都無謂！」睇到呢度，菲菲直頭拍爛手掌。大家都見大行報告見光前，春江鴨一早做晒反應。好似民行（1988）咁，摩通最新報告將目標價狠劈兩成到7.25元，睇番資料，摩通噚日已沽走284萬股，佔成交近5%，係噚日十大淨賣出券商第2位；今日當然已榜上無名。眼見民行跌到一仆一碌，小股民名副其實「沽都無謂」。麥提爽仲講「人要搵食，梗係自己食完先到你哋食」，呢個邏輯合理喎。所以各位睇報告、讀股評，小心解碼咪死跟，切記認真便輸了。Fifi本欄逢周二、四刊出