乜嘢行業最能抗經濟衰退？炒開股的戰友都知，係同衣食住行有關的行業。四者當中，又以食最為重要。嫌去酒樓貴，快餐店平靚正，生意自然逆市增長。去年收購吉野家內地業務的合興集團（047），變身快餐股初見成績，公司市值唔夠3億銀，低過殼價，想小注博大贏，要睇實此股！合興上半年業績省鏡，純利5952萬銀，按年飆98%，當中快餐業務佔營業額69%，達9.57億元，更佔經營溢利95%，可見已成功轉型。首季同店銷售增長16%，毛利率維持60%水平。集團目前於內地經營吉野家及甜品店Dairy Queen，上半年新增51家分店，包括30家吉野家及21家Dairy Queen，令總分店數目達239家及129家；下半年擬再添39家分店，有助盈利保持高增長，未來更不排除將本港吉野家注入，勢成另一炒作元素。估值方面，合興上半年每股基本盈利11.47仙，保守假設下半年盈利相同，全年每股盈利22.94仙，現價預測PE得2.2倍，平得可憐。不過，因收購涉及發行可換股債券（換股價0.37元），如悉數兌換，攤薄後每股盈利為1.2仙，預測PE高約40倍，但業務剛上軌道，相信仍未到換股之時，毋須過份憂慮。魏力 http://www.facebook.com/2012jason