破曉前的黑夜很漫長，不想有天醒來發現facebook消失世上，身邊的小孩都別上紅領巾，「陳伯」、天主教香港教區榮休主教陳日君樞機，提醒香港人不要認輸氣餒，立法會選舉一定要投票，「家嘅局面可以逆轉㗎，靠我哋囉，靠我哋自己。」他認為候選人不應該只顧選票，犧牲香港的長遠利益，「大家（黨派）淨係諗自己嘅選票，就會幫唔到個社會，要勇敢啲，甚至有時有啲嘢，睇嚟社會上唔係即刻接受，但係公道嘅嘢都要維持囉。」陳伯相信，梁振英上場後推動民主、爭取普選會更困難，「梗係難啦，佢共產黨嚟㗎，惟有有嘢攞出嚟講囉，唔好咁快認輸囉，大家都要出嚟講㗎，嗰啲（喺大陸）做生意嘅人就麻煩啲啦，佢哋諗自己生意，但唔做生意嘅老百姓要出嚟講，家唔需要怕佢㗎，幾個人出嚟肯定秋後算賬，多人出嚟佢就唔敢亂嚟。」面對自由進一步被收窄，孩子的思想被染紅，警權不斷擴大，陳伯認為香港人「早應該預料有今日」，「邊個唔預料呢啲嘢，表示好天真，表示唔認識中國。」他又形容「西環治港」是人所共知，「好明顯，都唔顧忌喇，俾人睇到都唔怕醜㗎喇，赤裸裸㗎喇。」和另一位與中共多次交手的老伯倪匡不一樣，眼前雖然盡是漆黑，陳伯認為不能放棄，「家嘅局面可以逆轉㗎，靠我哋囉，靠我哋自己，唔好咁快認輸。」他以當年校本條例修訂為例，「佢哋最緊張教會啲學校，所以2000年教會啲學校輸晒，如果嗰時我哋動員啲家長，可能唔輸都話唔定。所以家呢個（反）國民教育一定唔可以停，要大家團結啦。」所謂的「靠自己」，是指群眾要繼續就不公義的事發聲，「你有能力嘅，可以移民囉；你覺得可以忍受咪忍受，唔可以忍受，就繼續講嘢囉。我哋有信德嘅人，信天主會行奇蹟，唔知中國會唔會出個Gorbachev（戈爾巴喬夫）呢？我都叫佢（天主）醒番喇，唔好瞓覺。」面對回歸後一次又一次爭取普選失敗，陳伯說未有灰心，「不過覺得有時真係幾無奈嘅，如果我哋唔出聲，咪越來越差！我哋繼續努力，至少可以保持到少少，保持到有一日國內有改變，裏面唔改變，我哋呢度冇希望㗎，唔好有幻想，我哋香港咁細點同佢鬥啫，鬥唔過㗎啦，壓落嚟㗎家，鬥唔過佢，呢度啲人咪即刻投降囉，根本幫兇嘅人好多囉。」要表達聲音，9月9日立法會選舉投票是其中一種方法，「點都要有啲唔同嘅聲音，唔係畀佢贏晒咪仲麻煩，立法會人哋已經係多數，如果你都冇一個相當少數去抵制佢呢，佢咪一路順風囉，乜都通過㗎喇。」在這個混亂的時代，投票應該有何準則？陳伯認為應該看候選人的政綱是否從本港的長遠利益着想，而不是單一界別、單一族群的利益，「你唔可以單單諗自己嘅利益，大家（黨派）淨係諗自己嘅選票，就幫唔到整個社會，要勇敢啲，甚至有時有啲嘢，睇嚟社會上唔係即刻接受，但係公道嘅嘢都要維持囉。」他呼籲香港人一定要去投票，「每一票都緊要㗎，人人都要出嚟投票呀，佢哋（建制派）嗰啲就會出嚟㗎喇，我哋嗰啲有時懶惰呀，有時啲好人好麻煩㗎，啲好人唔夠緊張囉，要緊張啲㗎，人人都要出嚟㗎，一票都唔好嘥咗。」《蘋果》記者張嘉雯