儍瓜DC被iPhone打個半死，偏偏M4/3機逆市爬升越賣越旺，機輕相又靚，最重要係型嘛！近年更潮興皮套加身，幾款韓製牌子賣成千蚊仍被追捧，全因真皮兼全人手縫製，散發出極Raw佬味，令你走在旺角街頭，途人不禁向你行注目禮。記者：徐影龍攝影：周旭文模特兒：姚浩政
1〉金屬固定唔變形
第一眼望到櫥窗，已經被CIESTA皮套吸引，皮紋配上醒目縫線，令相機不再冰冷，增添不少「人味」。摸上手相當軟熟舒服，裝拆亦容易。八月剛返改良版款式，喺底部加上一層金屬板，令機套不易變形，兼且配上三腳架，亦唔怕括花皮套。Olympus OM-D CIESTA皮套（$860）、相機帶（$360）/a
2〉皮多佬味更重
明明係同一皮料，對應富士X10嘅深啡色皮套，零舍靚過人，皮紋及白色縫線喺深色襯托下格外顯眼。雖無金屬底板，不過造就前後皮料增加，「佬味」更重。連我呢個X10用家，拎上手都唔願放低。富士X10 CIESTA皮套（$710）、相機帶（$360）/a
3〉相機袋變潮袋
另一韓牌GARIZ本身出機套，不過新返嘅相機袋更吸引。棗紅色牛皮勁搶眼，全人手製作，成熟中帶斯文，內櫳間隔實用，相機同Tablet擺晒落去都無問題。GARIZ真皮相機袋（大$1,450、細$800）/b
4〉百零蚊有得玩
相機套同iPhone殼一樣，都可平有平玩，好似呢款SONY NEX-7仿皮套咁，百零蚊貨仔，手感同樣不俗，膠感亦唔算重，最大賣點係連鏡頭都保護埋。店員話三支Kit鏡都啱用，最重要係顏色選擇夠多，仲有令面、荔枝紋、網紋畀你揀，襯埋衫出街都仲得。SONY NEX-7仿皮套（$158）/b
相機配件多過iPhone
時代變喇，業餘拍友除咗愛上更輕巧嘅細機，亦唔興收埋落個老套相機袋，簡簡單單斜孭或掛頸出街，自我感覺已經相當良好。揀套已成一種潮流，你睇旺角星際城市，賣相機配件舖頭仲多過手機就知。
外國人多過自由行
「近年好多人揀韓國牌子CIESTA，除咗款式夠經典，真皮機套仲係全人手縫製。一個套賣到$700以上都有好多人幫襯，就算用上更靚更軟熟嘅意大利皮型號，好似Leica M8/M9、富士X-Pro1咁，賣過千蚊佢哋都捨得畀。無計，部相機萬萬聲，一千蚊個套好濕碎。以旺角舖為例，就算周街自由行最後都係外國人幫襯多，大概每日賣到2-3個，咁貴嘅配件算幾勁。」
仔唔捨得買
「GARIZ喺韓國好出名，好多客喺網上知道我哋有得賣，特登落嚟揀套同袋，都係鍾意佢真皮同Hand Made。客路年齡大多上咗年紀，因為佢哋較明白物有所值，唔似啲仔咁，把口猛讚話靚，一問價就嫌貴，最後揀番百零蚊仿皮套囉。」
查詢：（a）G&O（2782 2023）（b）日昇（2770 3710）