愛馬仕力抗LV！前年10月，LVMH集團突然話持有Hermès（愛馬仕）17%股權後，愛馬仕家族一直周身唔舒服，曾出口術想對方減持，LVMH唔理佢，搞到愛馬仕要出絕招，要求法國檢察官開file查LVMH係咪利用內幕交易手段靜雞雞收集愛馬仕股份。
向檢察官投訴
話說LVMH早幾年同銀行做咗好多衍生工具合約，前年10月突然換晒股票，愛馬仕家族知道後一直唔多高興。前日法國檢察官辦公室承認，愛馬仕今年7月投訴LVMH內幕交易同埋操控股價。LVMH當然反擊，指有關指控係抹黑、誹謗，重申收購愛馬仕股份係合法嘅。查實愛馬仕家族為防止LVMH提出全面收購，成立咗間新公司持有愛馬仕股權，但LVMH仍然不斷增持愛馬仕，去到22.3%。可能因為咁，愛馬仕忍無可忍，即使法國監管機構睇緊呢單收購，都忍唔住要自己出手先。