壹傳媒前日通告，表示有人正洽購台灣《蘋果》、台灣《壹週刊》和台灣《爽報》等印刷傳媒業務。以肥佬黎性格，有人要洽購佢嘅生意，佢唔用粗口鬧你，即係有意思賣！肥佬黎二千年開始在台灣做媒體生意，先搞台灣《壹》、兩年後台《蘋》、幾年後又台《爽》，週刊現時是台灣最大的雜誌，報紙是台灣零售最多的報紙，年年賺大錢，如今計劃出售，真係十年一覺台灣夢。沙膽虹仲以為，肥佬黎點都會有點黯然，怎料前日見到佢，隻字不提之餘，仲好似乜事都冇發生咁！佢前日傍晚捉咗沙膽虹入佢辦公室，話大班的電台就快唔做，不如找他幫《爽報》開咪，叫做「大班直播室」，唔止有聲聽，仲有埋影像，取代現時的「開片有錢分」。除咗大班的節目之外，數碼電台其他高收聽率節目，都可以在《爽報》網上和手機平台直播！肥佬黎越講越興奮，二話不說就約咗數碼電台神童輝翌日清晨去陸羽飲茶，傾好今日開始就即刻直播，佢仲高興到自己親自出馬，同大班齊齊開咪，而且一日都唔夠喉，話要連開幾日，而且仲要去新政府總部探望學生，在現場做埋「拉闊」㖭。肥佬黎在台灣玩到冇癮，全副心機返嚟香港，江湖從此又多事了！沙膽虹