金利來（533）老闆曾憲梓同經營金至尊嘅香港資源（2882）老闆黃英豪，兩位都係紅色商人，亦一向老友，唔知係咪坐埋食飯傾偈嗰陣諗出條橋，合作將皮具同鑽石結合，整批鑲鑽皮帶賣畀強國人。金利來噚日出通告話同香港資源訂立採購協議，包括但不限於珠寶首飾、配飾同業禮品等，金利來賣開衫同皮具，同金至尊風馬牛不相及，採購乜嘢呀？
200萬買金至尊出品
金利來財務總監甘耀國就解釋，金利來唔係打算生產純金扣皮帶，而係諗住生產一批個扣鑲鑽嘅皮帶賣畀強國人，暫時攞咗200萬左右向金至尊採購鑽石，預計首批生產一百幾十條，今年底或明年初放喺個別內地門市賣，每條belt要幾萬人仔，睇吓強國人受唔受落咁話。講到呢度，華華淨係諗到，用呢條鑲鑽皮帶嘅男士，去廁所時要好小心，解扣時又唔可以粗魯，如果唔覺意整跌一兩粒鑽石，咁就失真，搞到條鑽皮冇咁矜貴囉。不過，生產商應該會將啲鑽石鑲得好實嘅！金利來年初搵咗鄭伊健為呢條鑽皮喺廣州行貓步，企圖令人覺得戴呢條鑽皮好有型。之但係，內地消費力開始轉弱，仲有幾多人願意攞幾萬人仔出嚟買條belt呢？李華華mailto:[email protected]