從事獅球嘜食油生意的合興（047），舊年以「蛇吞象」之勢，向大股東洪氏買入內地東北幾百間吉野家及Dairy Queen業務，上星期出咗半年業績，盈利爆升98%，市場唔理咁多即刻熱炒，噚日又升咗11%。海迪當佢下半年都喺賺咁上下錢，計落今年市盈率三倍都唔夠，似乎平到爛。不過，如果睇埋佢為咗收購吉野家，而造成的種種潛在攤薄同影響，海迪會覺得呢碗牛肉飯仲係好貴。合興為咗收購吉野家，舊年底發咗批價值34.75億元可換股債券（CB），換股價0.37元，無年期，即合興呢世都唔使贖回CB，但就要每季還息畀大股東，年息率3.5厘。條款講明，如果合興每季唔能夠準時還息，公司亦唔准派股息畀股東。呢個半年，合與就要還CB利息合共約3700萬元，公司半年都係賺5951萬元，淨現金得8900萬元，所以唯有延遲還息，即上市公司股東都唔會有息派。有錢賺但小股東無錢落袋，而且情況似乎係會持續一段時間，感覺好難買得落手。洪家原本已持有合興66%，行使晒CB會去到98%，加上公司要發展、或者再注入香港業務，樣樣都要燒錢，長遠而言合興似乎有必要搵啲投資者入局。呢個時間買，似乎無乜着數。海迪