平時喺微博唔活躍嘅蘇永康，噚日喺微博上載咗張相，話自己去咗個人資料私隱專員公署，仲話因為有地產代理未經佢同意，喺地產刊物登咗佢名下物業嘅相，蘇康話本來想大事化小，但有關方面用大話冚大話，冇誠意解決，激到蘇康將件事交畀律師處理，至於佢去咗私隱專員公署，原來係幫港台拍劇。
要求更正不果
見蘇康咁嬲，馮仁昭梗係搵佢八吓啦，蘇康喺電話好詳細咁解釋：「我前年買嗰間碧瑤灣樓放租，兩星期前交咗畀三間地產經紀，訂明只租唔賣，只賣文字廣告唔做圖文廣告，點知有地產刊物登咗出嚟，寫明地產代理係利嘉閣，層樓賣1,800萬仲登晒相。我覺得有誤導之嫌，話我賣樓，俾人話我經濟唔掂點算呀？我只係要求利嘉閣登更正、道歉啟事，但佢哋拖完一星期就話冇呢個先例，所以拒絕，我交畀律師處理，如果佢哋唔道歉更正就行動升級，去地產代理監管局投訴。」
另外，噚日上晝拍完劇，蘇康下晝兩點半去咗中環ifc買嘢，好快買完就畀錢走，出嚟見到記者笑笑口話：「扮睇唔到，你哋繼續。」跟住就搭電梯走人。