早幾日，基斯坦奴朗拿度（C朗）無啦啦話唔開心，搞到全世界都好緊張，以為佢會離開皇家馬德里。呢單C朗風波未完，到巴塞隆拿嘅法比加斯學人扭計鬧情緒，話成日踢唔晒全場，要佢黑住面返屋企喎。老實講，我求大俠睇番法比嘅開季表現，可以話大跌watt，抵佢場場俾人換走啦！
「想踢晒每一分鐘」
法比接受西班牙電台訪問時話，佢好唔想做替補，希望成為核心主力，「喺足球世界入面，從來冇偉大嘅替補球員！我唔會同你講，我只想做個優秀嘅後備，每個人都想踢晒賽季嘅每一分鐘。教練清楚我嘅能力，我可以踢3個位置，但要同3個世界級球員爭正選。喺球場上唔開心，我唔會表露出嚟，唔會畀面色隊友同教練睇；如果要黑面嘅話，我會返到屋企先。」
法比可以踢前鋒、進攻中場同中場指揮官，可惜要分別同美斯、恩尼斯達同沙維爭位，真係幾難搞。不過，教練維蘭路華絕對冇厚此薄彼，法比除咗喺西超盃嗰兩場打後備，開季3場西甲都踢正選；其中兩場代替恩尼斯達，另一場就頂沙維，都可以話畀足機會。
聯賽頭3仗冇表現
點知法比唔珍惜，呢3場踢得好麻麻，唔單止冇入波同冇助攻，連射門同威脅傳球次數都差咗；難怪場場踢到60分鐘左右，教練都要換走佢！老實講，法比上季加盟嗰陣真係相當威猛，係咁入波，不過到下半季已經沉落嚟；到今季上陣機會唔係冇，只係自己表現繼續冇起色，咁樣怨又有咩用呢。
「原來我非不快樂，只我一人未發覺。」睇番法比仔呢兩年，我求大俠諗起呢句歌詞。佢年紀輕輕，就喺阿仙奴踢到風生水起，之後返到巴塞，捧盃捧到手軟，喺國家隊又拎晒世界盃同歐國盃。愛情方面，更加識咗富豪女友丹莉娜，佢兩個不知幾咁甜蜜；講到老友，美斯、碧基全部都係同法比由細玩到大嘅好兄弟；再講仕途，由哥迪奧拿到家嘅維蘭路華都成日畀機會佢，唉！係佢自己唔爭氣，越踢越差啫！
