生平蒲過MK上樓Cafe一次，怕怕！煙霧瀰漫濁到我氣咳，男大聲講女細聲笑爹娘滿天飛，震爆耳膜想靜吓都唔得。但今番北上蒲嘅呢間Cafe，就令我對蒲Cafe有番晒興趣，何解？場夠大夠靜，環境佈置有格調，坐喺度成個人都高貴咗呀！ 文、攝：中行線
唔係作大，「92℃ Coffee Club」真係超大，大到可以分地舖同閣樓兩層，同香港啲豆膶上樓Cafe相比，真係蚊髀同牛髀。而且唔係得個大字，室內設計得好精緻，一邊紅磚牆予人粗糙感覺，上面掛滿用畫框裱起嘅黑白懷舊相片同海報，另一幅白漆牆貼滿各地旅遊小冊子同地圖，凌亂得嚟又幾特別。
揀張舒服梳化坐低，Order杯莫卡咖啡周圍望，Cafe內九成係木傢私，靠窗有卡座，十分好Feel。最矚目係個三層高大書架，書本排列整齊，有超過三千本外文原版書籍、藝術雜誌同攝影集，任揭唔嬲。行過啲，有個擺滿精緻瓷製杯碟嘅半身木櫃，另一邊有幾個小木箱，放滿波子棋、象棋、層層叠、圍棋等等Board Game。再睇睇，嘩！唔係啩？居然仲有個壁爐，雖然一睇就知係裝飾嘅啫，但喺呢個甚麼都擺上面書嘅時代，又一影相靚位啦！壁爐側邊有座鋼琴，有信心不妨彈番一曲，當然，唔識彈就咪亂敲琴鍵嘈生晒擾人清靜嘞。
平價享受高貴悠閒
香港上樓Cafe提供嘅食物，大家心中有數，最叻就係畀張外賣紙你，再唔係就屈你食叮叮魚蛋，呢度就唔同嘞，想飽肚必點意大利麪，煙肉份量勁多，番茄味好濃，人仔唔使三十皮真係唔貴囉。仲有嗜甜女生必點嘅鬆餅，烤得鬆脆，鋪面焦糖同忌廉多到漏，每啖都甜到入心。
採訪當日，遇到熟客劉先生同莫小姐，兩位異口同聲話：「呢度感覺好舒服，環境好靜，入到嚟就自自然然會降低聲浪，講說話都細聲啲。」佢哋仲話呢間Cafe好多學生捧場，霸張長枱就一齊開會做功課，亦有唔少西裝友拎埋部私人電腦獨坐一角，一坐就幾粒鐘；而劉先生本人，更加試過睇睇吓書唔覺意瞓着咗，「醒番已經天黑，張梳化好軟綿，攬住個咕一挨，仲舒服過屋企張床呀！」好Hea，全因夠靜，可以想像呷住咖啡睇小說，無人打擾你投入小說世界，輕輕鬆鬆消磨一個悠長下午，呢份悠閒，真係多多錢都未必買到。
飲品方面，侍應程小姐就推介話：「我自己就好鍾意飲意大利泡沫咖啡，夏天飲透心凉。家我學緊拉圖案，呢杯莫卡咖啡靚唔靚呀？」靚，真係好靚，靚到有啲唔捨得飲㖭呀。
92℃ Coffee Club
地址：深圳市福田區南園路72號
電話：（86）755-83629008