數碼通（315）總裁黎大鈞今年初俾其他電訊商跣咗一鑊，原本諗住帶頭宣佈取消無限上網計劃，點知呢頭講完，轉頭就要收番，搞到人抑馬翻。黎總對呢單嘢耿耿於懷，噚日自爆嗰次係俾人跣，仲揚言：「睇吓我跣唔跣佢哋！」數記今年初率先宣佈取消無限上網計劃，如意算盤，係其他電訊商照跟，咁就可以一齊向班高用量客戶收多啲，點知主要競爭對手CSL同3仔都唔跟，數記惟有投降，重推無限上網。噚日黎總喺業績記者會上俾人挑起佢呢個要害，即刻狠狠講話「上次俾人跣咗我哋」，問佢遲吓會唔會再帶頭有乜行動，佢就話「唔會再行前」，唔會再畀機會人哋跣佢咁話。突然醒起，聖經話有人打你左面，畀埋右面佢打，但呢句說話應該唔啱黎總聽。