還記得之前亞視為台慶Plug咗首膠歌，其中幾句歌詞係「明明香港第一間電視，點解唔係One，屈我做2。」今次終於俾佢恨到啦，不過講緊嘅係投訴數字，亞視最新一集嘅「ATV焦點」，內容嚴重扭曲本港政黨形象，將反對黨形容為破壞派，仲騎劫埋學民思潮，市傳已經接到過萬宗投訴，TVB（511）普選港姐失敗都只係得幾百宗投訴，完全被比下去。呢輯節目名副其實係國民教育嘅典範，小朋友心智未成熟，照單全收後果肯定不堪設想。By the way，噚日突然傳出政府會再批免費電視牌照，TVB即刻插水4%，有線寬頻（1097）就炒到飛起，飆升近三成，都唔知係咪同亞視壇嘢有關。近期REITs屢創新高，皆因高息夠穩陣，主打中港及大馬酒店業務嘅麗悅酒店（2266），舊年全年派息12仙，現價息率有6.6厘，好過唔少REITs，今年首季（3至6月）業績亦對辦，平均每間客房收入有近一成增長，股價應該仲有得去。唐牛